ADYM.KZ / Биыл тұрғын үй-коммуналдық шаруашылығы саласына шамамен 1,3 трлн теңге инвестиция тартылды. Бұл туралы Павлодар қаласында өткен «Энергетикалық және коммуналдық секторларды жаңғырту» ұлттық жобасы бойынша Жобалық кеңсенің көшпелі отырысында мәлім болды.
Премьер-министрдің орынбасары Қанат Бозымбаевтың төрағалығымен өткен жиында өңірлердің алдағы жылыту маусымына дайындығы, коммуналдық инфрақұрылымды жаңғырту жобаларының жүзеге асырылуы және қаржыландыру мәселелері талқыланды.
Ұлттық жоба аясында 767 млрд теңге бөлініп, жалпы құны 164,8 млрд теңгені құрайтын 37 пилоттық жобаны іске асыруға мүмкіндік жасалған. Қазір құны 459 млрд теңге болатын 242 жоба конкурстық рәсімдер кезеңінде тұр, ал 175 нысан бойынша мердігерлер анықталған.
Жобалар халықаралық қаржы ұйымдары, екінші деңгейлі банктер, «Бәйтерек» холдингі және мемлекеттік қолдау құралдары арқылы қаржыландырылуда.
Мониторинг қорытындысына сәйкес, Алматы мен Шымкент қалалары, сондай-ақ Түркістан және Ұлытау облыстары конкурстық рәсімдер мен келісімшарттарды рәсімдеу қарқыны бойынша артта қалып отыр.
Вице-премьер барлық қаржыландыру көздері қарастырылғанын айтып, өңірлерге құрылыс-монтаждау жұмыстарын уақытылы бастап, жобаларды сапалы орындауды тапсырды.
Павлодар облысы ұлттық жобаны жүзеге асырудағы белсенді өңірлердің бірі ретінде аталды. Өңірде соңғы 30 жылда алғаш рет инженерлік инфрақұрылымның тозуын тоқтатуға қол жеткізілген. 2025-2027 жылдары облыста жалпы құны 131,6 млрд теңгені құрайтын 55 жобаны жүзеге асыру жоспарланған.
Жиын қорытындысында жауапты органдарға кешігіп жатқан жобаларды жеделдету, конкурстық рәсімдерді қысқа мерзімде аяқтау және ұлттық жобаға отандық өндірушілерді кеңінен тарту тапсырылды.
