ADYM.KZ / Шымкент қаласының бес ауданында кәмелетке толмағандар арасындағы құқық бұзушылықтардың алдын алу және жасөспірімдердің қауіпсіздігін қамтамасыз ету мақсатында жалпықалалық түнгі рейд ұйымдастырылды.
Профилактикалық іс-шараға Шымкент қаласы Полиция департаментінің, аудан әкімдіктерінің және Жастар ресурстық орталығының қызметкерлері қатысты. Рейд барысында жауапты мамандар жасөспірімдердің түнгі уақытта қоғамдық орындарда жүруіне қатысты талаптардың сақталуын тексеріп, құқық бұзушылықтардың алдын алу бағытында жұмыстар жүргізді.
Тексеру кезінде кәмелетке толмаған жасөспірімдердің түнгі уақытта ата-анасының немесе заңды өкілдерінің еріп жүруінсіз ойын-сауық орындарында болған жағдайлары анықталды. Аталған деректер бойынша тиісті түсіндірме жұмыстары жүргізіліп, заң талаптарын бұзу фактілеріне қатысты әкімшілік хаттамалар толтырылды.
Рейд қорытындысы бойынша Қазақстан Республикасының Әкімшілік құқық бұзушылық туралы кодексінің тиісті баптарына сәйкес барлығы 79 әкімшілік хаттама рәсімделді. Атап айтқанда: 127-1-бап бойынша – 1 хаттама; 132-бап бойынша – 9 хаттама; 442-баптың 1-бөлігі бойынша – 12 хаттама; 442-баптың 2-бөлігі бойынша – 54 хаттама; 442-баптың 3-бөлігі бойынша – 3 хаттама толтырылды.
Кәмелетке толмағандардың түнгі уақытта заңды өкілдерінің қарауынсыз жүруі олардың қауіпсіздігіне қауіп төндіруі мүмкін. Сондықтан мұндай профилактикалық іс-шаралардың негізгі міндеттерінің бірі – жасөспірімдердің өмірі мен денсаулығын қорғау, құқық бұзушылықтарға жол бермеу және ата-аналардың жауапкершілігін арттыру.
Сонымен қатар рейд жұмыстары жастар арасында құқықтық сауаттылықты қалыптастыруға, қоғамдық тәртіпті сақтауға және қауіпсіз орта құруға бағытталған. Бұл ретте полиция қызметкерлері мен жергілікті атқарушы органдар өкілдерінің бірлескен жұмысы маңызды рөл атқарады.
Жалпықалалық түнгі рейд жұмыстары алдағы уақытта да жалғасады. Негізгі басымдық – жасөспірімдер арасындағы құқық бұзушылықтардың алдын алу, олардың қауіпсіздігін қамтамасыз ету және заң талаптарының сақталуына ықпал ету.
