ADYM.KZ / Президент Қасым-Жомарт Тоқаевтың Қытайға жасаған мемлекеттік сапары Қазақстанның биылғы сыртқы саясатындағы маңызды оқиғалардың біріне айналды. Сапар қорытындысында жалпы құны 15 миллиард доллардан асатын 70-тен астам коммерциялық келісімге қол қойылып, жасанды интеллект, цифрлық экономика, өнеркәсіп, көлік және энергетика салаларында жаңа уағдаластықтарға қол жеткізілді.
Сарапшылардың бағалауынша, Астана мен Бейжің арасындағы ынтымақтастық дәстүрлі сауда мен инвестиция шеңберінен шығып, жоғары технологиялар, өндірісті жергіліктендіру және инновациялық жобаларды бірлесіп дамытуға негізделген жаңа кезеңге аяқ басты.
ҚР Президенттік орталығының жетекші сарапшысы, саясаттанушы Алмас Әубекеровтің айтуынша, Қазақстан мен Қытай біртіндеп «мұнайға айырбас – тауар» моделінен технологиялық интеграцияға көшіп келеді.
Оның пікірінше, жалпы құны 15 миллиард доллардан асатын 70-тен астам келісімнің жасалуы – екіжақты қарым-қатынастың жаңа сапалық деңгейге көтерілгенінің нақты көрінісі.
Сарапшы сондай-ақ жасанды интеллект, робот техникасы және цифрландыру бағытындағы жобаларға Қытайдың қатысуын Қазақстанға деген жоғары сенімнің белгісі деп бағалады. Оның айтуынша, бұл бағыттағы ынтымақтастық жаңа өндірістерді іске қосып, жоғары қосылған құны бар экономиканы дамытуға мүмкіндік береді.
Ал саясаттанушы Жанат Момынқұловтың пікірінше, Тоқаевтың сапары Қазақстан мен Қытай арасындағы ынтымақтастықтың жаңа стратегиялық күн тәртібін қалыптастырды. Оның ішінде цифрлық экономика мен жасанды интеллектке басымдық беріліп отыр.
Сарапшы Президент ұсынған Қазақстан–Қытай цифрлық хабын құру бастамасы елдің Орталық Еуразиядағы өңірлік технологиялық орталыққа айналуына жол ашатынын айтты. Мұндай хаб жасанды интеллект, үлкен деректер, бұлтты технологиялар және цифрлық инфрақұрылым салаларындағы бірлескен жобаларды дамытуға мүмкіндік береді.
Момынқұловтың сөзінше, Қытай да Қазақстанмен ынтымақтастықтың басымдықтарын өзгертіп келеді. Бұрын көлік дәліздері мен «Бір белдеу – бір жол» бастамасына көбірек мән берілсе, бүгінде цифрлық экономика, электронды коммерция, интеллектуалды логистика және инновациялық өндірістер негізгі бағыттардың біріне айналған.
Сонымен қатар сарапшы Қазақстанның Қытаймен байланысының нығаюы елдің көпвекторлы сыртқы саясаты өзгерді дегенді білдірмейтінін атап өтті. Оның айтуынша, Астана Ресеймен, Еуропалық одақпен, АҚШ-пен және Қытаймен теңгерімді әріптестікті сақтап келеді.
Сарапшылардың ортақ пікірінше, Қасым-Жомарт Тоқаевтың Қытайға мемлекеттік сапары екі ел арасындағы ынтымақтастықтың кезекті кезеңі ғана емес, жоғары технологиялар, цифрлық экономика, жасанды интеллект және өндірісті жергіліктендіруге негізделген жаңа серіктестік моделінің басталғанын көрсетті.
