ADYM.KZ / Шымкентте экологиялық қауіпсіздікті қамтамасыз ету және қоршаған ортаның сапасын жақсарту бағытында 2026 жылдың тоғыз айында атқарылған жұмыстар қорытындыланды. Бұл туралы Өңірлік коммуникациялар қызметінің алаңында өткен баспасөз мәслихатында мәлімделді.
Жыл басынан бері Шымкент қаласы бойынша Экология департаменті тарапынан 36 тексеру жүргізілген. Оның 17-сі профилактикалық бақылау аясында, 14-і жоспардан тыс тәртіппен өткізілсе, 5 тексеру белгіленген талаптарға сәйкестікті анықтауға бағытталған. Осылайша, тоғыз айдағы тексерулер саны өткен жылдың толық 12 айындағы 34 тексеруден асып отыр.
Тексеру нәтижесінде экологиялық талаптардың сақталуына қатысты 63 әкімшілік іс қозғалып, жалпы сомасы 288,5 млн теңге көлемінде айыппұл салынды. Оның 233,2 млн теңгесі бюджетке өндірілді. Сонымен қатар анықталған заңбұзушылықтарды жою және экологиялық талаптарды сақтау бойынша кәсіпорындарға 36 нұсқама берілді.
Бақылау жұмыстары барысында атмосфералық ауаның сапасына, қоршаған ортаға шығарылатын зиянды заттардың көлеміне және экологиялық рұқсат талаптарының орындалуына ерекше назар аударылуда. Қаладағы индустриялық аймақтарда орналасқан кәсіпорындардың қызметіне де жүйелі түрде бақылау жүргізіліп, экологиялық нормалардың сақталуы тексерілуде.
Мамандардың айтуынша, экологиялық бақылаудың негізгі мақсаты – тек анықталған заңбұзушылықтар бойынша жауапкершілік шараларын қолдану емес, қоршаған ортаға келетін зиянның алдын алу және оның себептерін жою. Осы ретте кәсіпорындарға өндірістік процестерді жаңғырту, тазарту қондырғыларының тиімділігін арттыру және экологиялық талаптарды қатаң сақтау бойынша тиісті шаралар қабылдау қажеттігі түсіндіріледі.
Экология департаментінің басшысы Ермахан Қозыбаев айыппұл салу негізгі мақсат еместігін атап өтті.
«Біздің басты міндетіміз – қоршаған ортаның ластану себептерін анықтап, оларды жоюға ықпал ету. Кәсіпорындардың өндірістік процестерін жаңғыртып, экологиялық талаптарды сақтауына басымдық беріледі. Берілген нұсқамалардың орындалуы заңбұзушылықтар толық жойылғанға дейін бақылауда болады», – деді ол.
Қазіргі таңда экологиялық талаптардың сақталуын бақылау жұмыстары жалғасуда. Алдағы кезеңде атмосфералық ауаның сапасын жақсарту, өндіріс орындарының қоршаған ортаға әсерін төмендету және қала тұрғындары үшін қолайлы әрі қауіпсіз экологиялық жағдай қалыптастыруға бағытталған шараларға басымдық берілмек.
