ADYM.KZ / Қазақстанда технологиялар мен жасанды интеллекттің дамуына байланысты еңбек нарығындағы бірқатар мамандықтың жойылуы немесе өзгеруі мүмкін. Бұл туралы Үкімет отырысында Еңбек және халықты әлеуметтік қорғау министрі Асқарбек Ертаев мәлімдеді.
Министрдің айтуынша, қазіргі таңда жұмыс күшіне сұраныс өнеркәсіп, құрылыс, ауыл шаруашылығы және IT салаларында жоғары.
«Сұранысқа ие кәсіптердің тізбесі 51-ден 174 кәсіпке дейін жаңартылып жатыр. Олардың қатарында инженерия, құрылыс, өңдеу өнеркәсібі, биотехнология, жасыл және ядролық энергетика бағыттары бар», – деді Асқарбек Ертаев.
Оның сөзінше, технологиялық даму мен жасанды интеллект еңбек нарығына айтарлықтай әсер етіп жатыр. Соның нәтижесінде кейбір кәсіптерге деген қажеттілік төмендеуі мүмкін.
Мысалы, мәтінді өңдеу және теру, деректерді енгізу, корректор секілді қызметтердің бірқатары автоматтандырылуы ықтимал.
Алайда министр еңбек нарығында мамандықтардың толық жойылуынан гөрі, олардың басым бөлігінің трансформацияланатынын атап өтті. Сонымен қатар еңбек нарығында бұрын болмаған жаңа кәсіптер мен қызмет бағыттары пайда болады.
«Кәсіптердің басым бөлігі трансформацияланады. Қызметтің мүлде жаңа бағыттары пайда болады. Бұл жағдайларда кадрлар даярлау жүйесі озық қарқынмен жұмыс істейді. Экономика салаларында перспективті мамандықтар алдын ала айқындалып, біліктіліктер мен білім беру бағдарламалары жедел жаңартылады», – деді министр.
Бұған дейін Қазақстанда 2035 жылға дейін экономикаға қосымша 2,9 млн кадр қажет болатыны хабарланған еді. Бұл ретте еңбек нарығындағы сұраныстың өзгеруі білім беру және кадр даярлау жүйесін жаңа талаптарға бейімдеуді қажет етеді.
