ADYM.KZ / Үкімет Абай облысының Курчатов қаласында қуаты 700 МВт болатын конденсациялық электр стансасын салу жөніндегі инвестициялық келісімді мақұлдады. Жобаның құны – 881 млрд теңге.
Тиісті қаулыға Премьер-министр Олжас Бектенов қол қойды. Жоба Мемлекет басшысы Қасым-Жомарт Тоқаевтың көмір генерациясын дамыту жөніндегі тапсырмалары аясында жүзеге асырылады.
Электр стансасы қуаты 350 МВт болатын екі энергия блогынан тұрады. Оларды кезең-кезеңімен 2032 жылға дейін пайдалануға беру жоспарланған. Жоба толық іске қосылғаннан кейін станса жылына 5 млрд кВт·сағатқа дейін электр энергиясын өндіре алады.
Жоба жеке инвестициялар есебінен жүзеге асырылады. Құрылыс барысында шамамен 4,4 мың жұмыс орнын ашу көзделген.
Жаңа станса Курчатов қаласының энергетикалық инфрақұрылымын күшейтуге мүмкіндік береді. Бұл қалада Ұлттық ядролық орталық, Ядролық технологиялар паркі, зерттеу реакторлары, зертханалар және термоядролық КТМ токамагы сияқты ірі ғылыми нысандар орналасқан.
Стансада «таза көмір» технологиялары мен заманауи бу энергетикалық жабдықтары қолданылады. Қоршаған ортаға әсерді азайту үшін газ тазарту, шығарындыларды сүзу және шаңды басу жүйелері қарастырылған.
Жоба іске қосылғаннан кейін Курчатовтағы электрмен қамтудың тұрақтылығы артып, ғылыми, өнеркәсіптік және қалалық инфрақұрылымды дамытуға қажетті қосымша электр қуаты қамтамасыз етіледі.
