ADYM.KZ / Ұлттық банк базалық мөлшерлемені 16,25%-ға дейін төмендетті
Қазақстан Ұлттық банкі базалық мөлшерлемені 16,25%-ға дейін төмендету туралы шешім қабылдады. Мөлшерлеме +/- 1 пайыздық тармақ дәлізімен белгіленді. Бұл туралы Ұлттық банктің Ақша-кредит саясаты комитеті хабарлады.
Реттеуші базалық мөлшерлемені төмендету туралы шешімді инфляция мен инфляциялық күтулер динамикасының жақсаруын ескере отырып қабылдаған.
Ұлттық банктің мәліметінше, Қазақстандағы жылдық инфляция тамыз айында 9,8%-ға дейін төмендеген. Осылайша, дезинфляциялық процесс қатарынан 11 ай бойы жалғасып отыр.
Азық-түлік инфляциясы 9,5%-ға дейін баяулаған. Бұған жеміс-жидек пен көкөніс бағасының айтарлықтай төмендеуі, сондай-ақ импорттық тауарлар бағасының арзандауы ықпал еткен.
Азық-түлікке жатпайтын инфляция да теңге бағамының нығаюы аясында төмендеп, 11,4%-ды құрады. Сервистік инфляция реттелмейтін қызметтер бағасының өсу қарқынының баяулауына байланысты 8,9%-ға дейін азайды.
Тамызда айлық инфляция 0,6% болды. Маусымдық факторларды есепке алмағанда бұл көрсеткіш 0,9%-ды құрады. Ал базалық инфляция 0,7% деңгейінде сақталды.
Инфляциялық күтулер де төмендеді
Ұлттық банктің бағалауынша, халықтың алдағы бір жылға инфляциялық күтулері де төмендеу үрдісін көрсетіп отыр. Шілде айында бұл көрсеткіш 12,1%-ға дейін төмендеген. Маусымда халықтың инфляциялық күтулері 13,4% болған еді.
Реттеуші мұны ҚҚС мөлшерлемесінің өсуіне, ТКШ тарифтері мен азық-түлік бағасының қымбаттауына қатысты алаңдаушылықтың бәсеңдеуімен байланыстырады.
Сонымен бірге инфляциялық күтулерге жанар-жағармай бағасының өсуі көбірек ықпал ете бастаған.
Нарықтағы кәсіби қатысушылардың 2026 жылдың соңына арналған инфляциялық күтулері 10% деңгейінде сақталып отыр.
2026 жылы инфляция 9-11% болады деп болжануда
Ұлттық банк 2026 жылға арналған инфляция болжамын өзгеріссіз қалдырды. Базалық сценарий бойынша жыл соңында инфляция 9-11% деңгейінде қалыптасады деп күтіледі.
Ал 2027 жылға арналған инфляция болжамы 6,5-8,5%-ға дейін көтерілді.
Ұлттық банк бұл өзгеріске сыртқы инфляцияның өсуі, реттелетін бағалар бойынша алғышарттардың қайта қаралуы және фискалдық серпіннің күшеюі әсер еткенін атап өтті.
2028 жылы инфляцияның 5%-дық нысанаға жақын деңгейде тұрақтауы күтіледі.
Реттеушінің бағалауынша, қазіргі кезеңде инфляция тәуекелдерінің теңгерімі проинфляциялық бағытқа ауысқан. Негізгі ішкі тәуекелдерге сұраныстың шамадан тыс кеңеюі, инфляциялық күтулердің тұрақсыздығы, жанар-жағармай бағасы мен ТКШ тарифтерінің өзгеруі жатады.
Сыртқы тәуекелдер, ең алдымен, геосаяси шиеленістің күшеюі жағдайында азық-түлік пен энергия ресурстарының әлемдік бағасының өсуіне байланысты.
ЖІӨ өсімі 4,5-5,5% деңгейінде сақталды
Ұлттық банктің базалық сценарийінде 2026 жылғы жалпы ішкі өнімнің өсімі 4,5-5,5% деңгейінде сақталған.
Экономикалық белсенділікке жоғары инвестициялық белсенділік, квазифискалдық ынталандыру бағдарламаларының іске асырылуы және тұрақты тұтынушылық сұраныс қолдау көрсетіп отыр.
2027 жылы Қазақстан экономикасының өсімі шамамен 4,5% болады деп болжануда.
Ал 2028 жылы салалық және жүйелік реформалардың іске асырылуы, фискалдық ынталандырудың жоспарлы түрде кеңеюі, сондай-ақ мұнай өндірісі мен экспортының қалпына келуі есебінен экономикалық өсім 4-5%-ға дейін жеделдеуі мүмкін.
Базалық мөлшерлемені одан әрі төмендету мүмкіндігі шектеулі
Ұлттық банк базалық мөлшерлемені төмендету туралы қазіргі шешім инфляция мен инфляциялық күтулердің оң динамикасы жағдайында қабылданғанын атап өтті.
Алайда 2027 жылға арналған инфляция болжамына әсер еткен проинфляциялық факторлар мен тәуекелдердің күшеюі базалық мөлшерлемені одан әрі төмендету мүмкіндігін шектейді.
Алдағы шешімдер инфляцияның жаңа деректеріне, оның болжамды траекторияға сәйкестігіне, ішкі сұраныс пен инфляциялық күтулердің өзгеруіне, реттелетін бағаларға, сондай-ақ фискалдық және квазифискалдық ынталандырудың көлемі мен әсеріне қарай қабылданады.
Ұлттық банк ақша-кредит саясатының негізгі мақсаты ретінде 2028 жылы инфляцияны орта мерзімді 5%-дық нысанаға дейін төмендетуді көздеп отыр.
Базалық мөлшерлеме бойынша келесі жоспарлы шешім 2026 жылғы 23 қазанда Астана уақытымен сағат 12:00-де жарияланады.
Айта кетейік, бұған дейін, 24 шілдеде, Ұлттық банк базалық мөлшерлемені 17%-дан 16,75%-ға дейін төмендеткен болатын.
