ADYM.KZ / Павлодар облысының Баянауыл ауданында туристерге арналған Vizit Bayanaul «Сарыарқа сыры» заманауи визит-орталығы ашылды. Жаңа нысан өңірдің туристік әлеуетін арттырып, биыл курорттық аймаққа келетін туристер санын 300 мың адамға дейін жеткізуге мүмкіндік береді.
Салтанатты ашылу рәсіміне Павлодар облысының әкімі Асайын Байханов қатысты. Өңір басшысы туризмді дамыту Мемлекет басшысы Қасым-Жомарт Тоқаев айқындаған басым бағыттардың бірі екенін атап өтті.
Оның айтуынша, Баянауылда кезең-кезеңімен заманауи туристік инфрақұрылым қалыптастырылып жатыр. Жаңа визит-орталық тек ақпараттық нысан ғана емес, өңірдің тарихы, мәдениеті мен рухани мұрасын цифрлық технологиялар арқылы таныстыратын орталыққа айналады.
Визит-орталық Баянауыл мемлекеттік ұлттық табиғи паркінің келушілеріне қызмет көрсететін негізгі ақпараттық алаң болады. Мұнда туристер демалыс бағыттары, табиғи көрікті жерлер, киелі орындар мен мәдени мұра нысандары туралы толық мәлімет ала алады.
Жалпы аумағы 740 шаршы метр болатын кешенде интерактивті туристік карта, музей кеңістігі, конференц-зал, коворкинг, трансформер-кітапхана, кофехана, ана мен бала бөлмесі және демалыс аймақтары қарастырылған.
Орталықтың басты ерекшелігі – жасанды интеллект технологияларының енгізілуі. Интерактивті мультимедиялық жүйелер арқылы келушілер Баянауылдың табиғаты, тарихы мен мәдени мұрасымен заманауи форматта таныса алады.
Іс-шара барысында өңірдің туризмін дамытуға үлес қосқан бірқатар азамат Павлодар облысы әкімінің Құрмет грамотасымен марапатталды.
Сондай-ақ белгілі өлкетанушы, Баянауыл ауданының Құрметті азаматы Алтынбек Құрмановтың «Көне Көктау оттары» кітабының тұсаукесері өтті. Басылымда өңір тарихына, тарихи-мәдени ескерткіштерге және Мәшһүр Жүсіп Көпейұлы, Қаныш Сәтбаев, Әлкей Марғұлан, Ермұхан Бекмахановтың мұрасына қатысты тың деректер топтастырылған.
Жұмыс сапары аясында Асайын Байханов Баянауылдың кіреберісінде бой көтерген жаңа стеламен де танысты. Биіктігі 30 метрлік сәулеттік нысанда салт атты бейнесі, ұлттық ою-өрнек және киіз үйдің кереге элементтері көрініс тапқан.
Соңғы жылдары Баянауылда туристік инфрақұрылымды жаңғырту жұмыстары қарқынды жүргізілуде. Сабындыкөл мен Жасыбай көлдерінің жағалауы абаттандырылып, жаңа жағажайлар, қоғамдық кеңістіктер мен қызмет көрсету нысандары салынуда.
Ресми мәліметке сәйкес, 2025 жылы Баянауыл курорттық аймағына 270 мың турист келген. Ішкі туризм 27 пайызға, ал шетелдік туристер легі 25 пайызға артқан. Биыл өңірге келетін демалушылар саны 300 мың адамға дейін жетеді деп жоспарланып отыр.
Жұмыс сапарының қорытындысы Сабындыкөл жағасында өткен Bayanaul FEST фестивалімен аяқталды. Мерекелік бағдарлама аясында спорттық жарыстар, отбасылық байқаулар және концерт ұйымдастырылып, сахнада Жұбаныш Жексенұлы, KeshYou, Нұрболат Абдуллин және Kalifarniya өнер көрсетті.
