ADYM.KZ / Қазақстан Қаржы министрлігі Қытайдың капитал нарығында жалпы көлемі 6,6 млрд юань болатын тәуелсіз панда-облигациялардың екінші шығарылымын сәтті орналастырды.
Облигациялар үш және бес жылдық екі траншпен шығарылды. Оның ішінде 5 млрд юань көлеміндегі үш жылдық облигациялардың жылдық купондық мөлшерлемесі 1,82%, ал 1,6 млрд юаньдық бес жылдық облигациялардың мөлшерлемесі 1,95% болды.
Шығарылым инвесторлар тарапынан жоғары қызығушылыққа ие болды. Қазақстан Қытай нарығында жоғары кредиттік рейтингке ие «А» санатындағы елдермен салыстырмалы шарттармен қаржыландыру тарта алды.
Қаржы министрлігінің мәліметінше, инвесторлардың белсенділігі Қазақстан экономикасын әртараптандыруға және орнықты дамуды қамтамасыз етуге бағытталған реформаларға оң баға беріп отырғанын көрсетеді.
Облигациялар S&P Global Ratings агенттігі Қазақстанның егеменді кредиттік рейтингін «BBB-»-тен «BBB»-ке дейін көтеріп, болжамын «Тұрақты» деңгейінде сақтағаннан кейін орналастырылды. Министрлік бұл шешім ел экономикасының орнықты өсу перспективалары мен мемлекеттік борыш деңгейінің төмен болуымен байланысты екенін атап өтті.
Қазіргі таңда Қазақстанның мемлекеттік борышы жалпы ішкі өнімнің 20,9%-ын, ал сыртқы мемлекеттік қарызы 4,5%-ын құрайды.
Жаңа шығарылым Қазақстан мен Қытай арасындағы сауда-инвестициялық және қаржы салаларындағы ынтымақтастықты одан әрі нығайтуға бағытталған. Қазақстандық эмитенттердің Қытайдың капитал нарығына шығуы елдің қаржыландыру көздерін кеңейтіп, займ портфелін әртараптандыруға мүмкіндік береді.
Үш және бес жылдық транштардың орналастырылуы Қазақстанның юаньмен көрсетілген егеменді қарызының өтеу мерзімдерін теңгеруге, сондай-ақ отандық квазимемлекеттік және корпоративтік эмитенттердің Қытай нарығына кейінгі шығуына жол ашуға ықпал етеді.
Мәміленің басты ұйымдастырушысы China International Capital Corporation Limited (CICC) болды. Бірлескен негізгі ұйымдастырушылар қатарында China Construction Bank (CCB), Industrial and Commercial Bank of China (ICBC), Export-Import Bank of China және Bank of China (BOC) бар. Жергілікті менеджер ретінде Teniz Capital Investment Banking қызмет атқарды.
Айта кетейік, Қазақстан Қытай нарығында алғашқы панда-облигацияларын биыл 26 мамырда орналастырған болатын. Ол кезде жалпы көлемі 3,4 млрд юань немесе шамамен 500 млн АҚШ долларын құрайтын үш жылдық облигациялар шығарылып, олардың жылдық купондық мөлшерлемесі 1,9% болды.
