ШЫМКЕНТ — ADYM.KZ / Шымкент қаласында кадрлық өзгерістер болып, Ішкі саясат басқармасы мен Балалар құқығын қорғау басқармасына жаңа басшылар тағайындалды.
Қазақстан Республикасы Президенті Әкімшілігінің келісімі және қала әкімінің өкімі негізінде Шымкент қаласының Ішкі саясат басқармасының басшысы лауазымына Азамат Парманов тағайындалды.
Азамат Бұхарбайұлы 1991 жылы Қазығұрт ауданында дүниеге келген. Қазақ гуманитарлық заң университеті мен Қазтұтынуодағы Қарағанды университетін тәмамдаған. Еңбек жолын 2014 жылы мемлекеттік кірістер органдарында бастап, кейін Шымкент қаласы әкімдігі құрылымдарында түрлі жауапты қызметтер атқарды.
Әр жылдары Еңбекші ауданы әкімдігі аппаратының бас маманы, қала әкімдігі аппаратының бас инспекторы, Қаратау ауданы әкімі аппаратының басшысы және аудан әкімінің орынбасары қызметтерінде болды. Сондай-ақ Еңбекші ауданы әкімінің орынбасары болып еңбек етті. Соңғы уақытқа дейін Шымкент қаласының Жастар саясаты басқармасын басқарды.
Сонымен қатар, қала әкімінің өкімімен Шымкент қаласының Балалар құқығын қорғау басқармасының басшысы қызметіне Мөлдір Кеуенова тағайындалды.
Мөлдір Тұрсынбекқызы 1985 жылы Төле би ауданында туған. Жоғары білімді маман М.Әуезов атындағы Оңтүстік Қазақстан мемлекеттік университеті мен Ж.Тәшенов атындағы университетте білім алған.
Еңбек жолын 2007 жылы жоғары оқу орнында оқытушы ретінде бастаған. Кейін мемлекеттік қызметке ауысып, ішкі саясат саласында жетекші маманнан басқарма басшысының орынбасарына дейінгі қызметтік сатылардан өтті.
Әр жылдары Шымкент қаласы әкімдігі аппаратының бөлім басшысы, бас инспектор, сондай-ақ ішкі саясат, дін істері, мәдениет және жастар саясаты бағыттарындағы басқармаларда басшылық қызметтер атқарған. Соңғы уақытта Шымкент қаласының Ішкі саясат басқармасы басшысының орынбасары қызметінде жұмыс істеді.
Жаңа тағайындаулар қаладағы әлеуметтік және қоғамдық-саяси бағыттағы жұмыстардың тиімділігін арттыруға бағытталған.
