«Құрметті қала тұрғындары мен қонақтары! Қазақстан Республикасы Тәуелсіздігінің 35 жылдығы аясында 2026 жылғы 28 қарашада сағат 12:00-де Арбат алаңында ұлттық мәдениет пен этносаралық достықты дәріптеуге арналған «ДОСТЫҚ» этнофестивалі өтеді!», деп хабарлайды Adym.kz ақпараттық сайты қала әкімінің Баспасөз қызметіне сілтеме жасап.
Бұл мерекелік іс-шара – халқымыздың бай мәдени мұрасын, сан алуан ұлттық дәстүрлерін таныстырып, еліміздегі этносаралық татулық пен қоғамдық келісімді нығайтуға бағытталған ерекше мәдени алаң. Фестиваль әртүрлі этнос өкілдерінің өнері мен салт-дәстүрін тоғыстырып, достық пен бірліктің маңызын кеңінен насихаттайды.
Мереке қонақтарын мазмұнды мәдени бағдарлама мен қызықты көріністер күтеді. Атап айтқанда, ұлттық дәстүрлер мен қолөнер бұйымдарының көрмесі, ұлттық тағамдар жәрмеңкесі, этномузыкалық әндер мен ұлттық билер, салт-дәстүр көріністері көпшілік назарына ұсынылады. Сонымен қатар келушілер халқымыздың тұрмыс-тіршілігі мен ғасырлар бойы қалыптасқан мәдени құндылықтарымен жақынырақ таныса алады.
Фестиваль аясында бүркітшілер мен саятшылардың өнері көрсетіліп, ұлттық спорт түрлерінен сайыстар ұйымдастырылады. Қолөнер шеберлерінің шеберлік сабақтары, этно базар, заманауи креативтік өнер туындылары да мерекенің мазмұнын толықтыра түседі. Келушілер ұлттық өнердің қыр-сырын танып қана қоймай, дәстүрлі бұйымдар мен тағамдардың ерекшелігін өз көзімен көріп, мерекелік атмосфераның куәсі болады.
«ДОСТЫҚ» этнофестивалі – ұрпақтар сабақтастығын нығайтып, ұлттық құндылықтарды жаңғыртуға, мәдени әралуандықты құрметтеуге және қоғамдағы өзара түсіністік пен ынтымақтастықты арттыруға арналған ортақ мереке.
«ДОСТЫҚ» – мәдениеттер тоғысқан, дәстүрлер жаңғырған, ынтымақ пен бірлік салтанат құрған мереке!
Баршаңызды мерекелік шараға шақырамыз!
Келіңіздер! Көріңіздер! Ұлттық мұрамызды бірге дәріптеп, достық пен бірліктің мерекесін бірге атап өтейік!








