ADYM.KZ / Қазақстан Республикасының Президенті Қасым-Жомарт Кемелұлы Тоқаев Астана қаласында өткен Стратегиялық серіктестердің III халықаралық форумында Мұхтар Әуезов атындағы Оңтүстік Қазақстан зерттеу университетіне «Ұлттық» мәртебе беру туралы шешім қабылдағанын мәлімдеді.
«Халқымыздың заңғар жазушысы Мұхтар Әуезов атындағы Оңтүстік Қазақстан университетіне «Ұлттық» мәртебе беру туралы шешім қабылдадым», – деді Мемлекет басшысы.
Бұл – университет тарихындағы маңызды белес әрі ұжымға артылған үлкен сенім. Мемлекет басшысының бұл шешімі оқу орнының көпжылдық тарихына, ғылыми әлеуетіне, қалыптасқан білім беру дәстүріне және ел дамуына қосқан үлесіне берілген жоғары баға.
1930 жылы негізі қаланған университет еліміздің оңтүстік өңіріндегі жоғары білім мен ғылымның ірі орталықтарының біріне айналды. Осы жылдар ішінде оқу орны талай білікті маман даярлап, отандық ғылым мен өндірістің, білім беру мен мәдениеттің дамуына елеулі үлес қосты. Бүгінде университетте түрлі бағыт бойынша мамандар даярланып, ғылыми-зерттеу жұмыстары жүргізіліп келеді.
Оқу орнының ғылыми-инновациялық әлеуетін арттыру, білім беру бағдарламаларын жетілдіру, халықаралық академиялық байланыстарды кеңейту бағытында жүйелі жұмыстар атқарылуда. Университет отандық және шетелдік жоғары оқу орындарымен, ғылыми орталықтармен ынтымақтастық орнатып, білім мен ғылым саласындағы тәжірибе алмасуға басымдық беріп отыр.
«Ұлттық» мәртебе университеттің жауапкершілігін арттырып қана қоймай, оның білім беру және ғылыми-зерттеу бағытындағы мүмкіндіктерін кеңейтуге жаңа серпін береді. Сонымен қатар бұл шешім жоғары білім сапасын арттыруға, бәсекеге қабілетті мамандар даярлауға және ғылымның ел экономикасы мен қоғам игілігіне қызмет етуіне жол ашады.
Жаңа мәртебе университеттің алдағы даму кезеңіне тың серпін беріп, оның еліміздің білім және ғылым кеңістігіндегі орнын нығайта түседі.







