ADYM.KZ / Қытайдың Гуйян қаласында бокстан Әлем кубогының екінші кезеңі басталды. Жарыстың алғашқы күнінде қазақстандық боксшы Сабыржан Аққалықов сәтті өнер көрсетті.
Әлем чемпионатының күміс жүлдегері, жақында 80 келі салмақ дәрежесіне ауысқан Аққалықов 1/16 финалда жарыс қожайыны Хиабао Уангпен кездесті. Қазақстандық спортшы қарсыласынан басым түсіп, жекпе-жекті төрешілердің бірауызды шешімімен 5:0 есебімен жеңді.
Осылайша Сабыржан Аққалықов турнирдің келесі кезеңіне жолдама алды. Енді ол 17 маусым күні әлем чемпионы, өзбекстандық Жавохир Умматалиевпен қолғап түйістіреді.
Айта кетейік, Әлем кубогындағы алғашқы жекпе-жегінде тағы бір қазақстандық боксшы Нұрбек Оралбай қарсыласын үш рет нокдаунға жіберіп, мерзімінен бұрын жеңіске жеткен болатын.
