ADYM.KZ / Қазақстан халқының Тілдер мерекесіне орай және «ALTYN ORTA» дамушы жастар орталығының бір жылдығына арналған шығармашылық кеш өтті. Жиын жастардың бос уақытын тиімді ұйымдастырып, оларды кітап оқуға, өнерге және рухани құндылықтарға баулуға бағытталған бастамалардың бірі болды.
Шараға Жастар ресурстық орталығының басшысы Жансерік Бауыржанұлы Жұман қатысып, жастарды шығармашылық ізденіске, білімге және өзін-өзі дамытуға ұмтылуға шақырды. Ол кітап клубының бір жыл ішінде атқарған жұмысына оң бағасын беріп, жастардың бастамаларын қолдаудың маңызын атап өтті. Сонымен қатар орталықтың дамуына белсенді үлес қосқан жастарға алғыс хаттар табысталды.
Шығармашылық кеш барысында қатысушылар өздері таңдаған поэзиялық шығармаларды оқып, дәстүрлі музыкалық аспаптарда күй орындады. Әсем әндер шырқалып, жастардың өнері ортаға салынды. Әдебиет пен өнер тоғысқан кеш қатысушыларға еркін пікір алмасып, шығармашылық қабілеттерін танытуға мүмкіндік берді.
«ALTYN ORTA» клубының негізгі бағыттарының бірі — жастар арасында кітап оқу мәдениетін қалыптастыру. Бір жыл ішінде клуб кітап талқылаулары мен шығармашылық кездесулер өткізіп, жастардың әдебиетке қызығушылығын арттыруға арналған тұрақты орта қалыптастырып келеді.
Мұндай бастамалардың маңызы Мемлекет басшысының кітап оқу мәдениетін дамытуға қатысты саяси ұстанымдарымен де үндеседі. Қасым-Жомарт Тоқаев жастардың білімге ұмтылысын арттырып, оқу мәдениетін кеңінен насихаттаудың маңызын бірнеше рет атап өткен. Президент 2026 жылы кітап оқу мәдениетін дамыту және зерделі ұлт қалыптастыру жөніндегі арнайы Жарлыққа қол қойып, балалар мен жастар арасында кітап оқудың тұрақты дағдыларын қалыптастыруды мемлекеттік саясаттың басым бағыттарының бірі ретінде айқындады.
Мемлекет басшысы сондай-ақ жастарды прогрессивті әрі жасампаз құндылықтар негізінде тәрбиелеу, олардың білімге, ғылымға және шығармашылыққа қызығушылығын арттыру қажеттігін атап өтті. Тамыз конференциясында Президент кітап оқу мәдениетін насихаттауға ерекше назар аудару қажет екенін айтып, бұл іске қоғам белсенділерін, шығармашылық және ғылыми қауымдастық өкілдерін кеңінен тартуға шақырды.
Осы тұрғыдан алғанда, жастардың бос уақытын мазмұнды өткізуіне мүмкіндік беретін кітап клубтары мен шығармашылық алаңдардың рөлі артып келеді. Мұндай орталар жастардың тек кітап оқуға қызығушылығын арттырып қана қоймай, өз ойын еркін жеткізуіне, пікір алмасуына, шығармашылық қабілетін дамытуына және қоғамдық ортаға белсенді араласуына жағдай жасайды.
«ALTYN ORTA» бастамасы да осы бағыттағы жұмысты жалғастырып, кітап пен руханиятты жастардың күнделікті өмірінің бір бөлігіне айналдыруды көздейді. Бір жыл ішінде қалыптасқан клуб алдағы уақытта да әдеби кездесулер, кітап талқылаулары, поэзиялық кештер мен шығармашылық жобалар ұйымдастыруды жоспарлап отыр.
Жастардың уақытын пайдалы іске бағыттап, олардың бойында білімге құштарлық пен кітап оқуға деген тұрақты әдет қалыптастыру — қоғамның зияткерлік әлеуетін арттырудың маңызды тетігі. Бұл ретте «ALTYN ORTA» секілді бастамалар жастардың рухани дамуына ықпал ететін ашық әрі шығармашылық ортаны қалыптастыруға үлес қосып келеді.
