ADYM.KZ / Шымкент қаласы жастар саясаты басқармасының «Жастар ресурстық орталығы» КММ-нің ұйымдастыруымен Жұмабек Тәшенов атындағы университетінде «Қауіпсіз отбасы – бақытты болашақ» тақырыбында кездесу өтті.
Іс-шараның негізгі мақсаты – тұрмыстық зорлық-зомбылықтың алдын алу, оның себептері мен адам өмірі мен денсаулығына тигізетін зиянды салдарын түсіндіру, сондай-ақ жастардың қауіп-қатерді дер кезінде танып, қиын жағдайда дұрыс әрекет ету дағдыларын қалыптастыру.
Кездесуге «Жастар ресурстық орталығы» КММ-нің Психологиялық көмек көрсету бөлімінің маманы Үміт Қайсарқызы Қоңрат, Әл-Фараби аудандық полиция басқармасының Қоғамдық қауіпсіздік бөлімі Отбасылық-тұрмыстық зорлық-зомбылыққа қарсы күрес бөлімшесінің инспекторы, полиция капитаны Анарбаева Әсемай Есенқызы, Тұран ауданы Ардагерлер кеңесі жанынан құрылған «АСЫЛ АНАЛАР» тобының мүшесі, қоғам белсендісі Ғалия Пірәліқызы Аймбетова және «АНА ҮЙІ» қоғамдық қорының аймақтық өкілі Тонтекова Калдар Жумабаевна қатысты.
Кездесу барысында мамандар отбасындағы өзара сыйластық, сенім мен жауапкершіліктің маңызына тоқталды. Қатысушыларға тұрмыстық зорлық-зомбылықтың психологиялық, физикалық және әлеуметтік салдары түсіндіріліп, оның алғашқы белгілерін дер кезінде байқаудың маңыздылығы айтылды.
Психолог Үміт Қайсарқызы Қоңрат отбасындағы қарым-қатынастарда эмоцияны басқару, өз сезімін дұрыс жеткізу және жанжал жағдайында тиімді коммуникация орнату мәселелеріне тоқталды. Сондай-ақ қиын жағдайға тап болған кезде адамның психологиялық жағдайын тұрақтандырудың және дер кезінде көмекке жүгінудің маңыздылығы түсіндірілді.
Полиция капитаны Анарбаева Әсемай Есенқызы тұрмыстық жанжалдың алдын алу және қауіпсіздікті қамтамасыз ету мәселелері бойынша құқықтық түсінік берді. Қатысушыларға құқық бұзушылықтың алдын алу, қауіп төнген жағдайда тиісті қызметтерге хабарласу және құқықтық көмекке жүгіну тәртібі жөнінде ақпарат ұсынылды.
Ал қоғам белсендісі Ғалия Пірәліқызы Аймбетова отбасындағы аға буынның тәрбиелік және қоғамдық рөліне тоқталып, жастар арасында отбасылық құндылықтарды насихаттаудың маңызына назар аударды. «АСЫЛ АНАЛАР» тобының жұмысы аясындағы тәжірибелермен бөлісіп, өзара түсіністік пен құрметке негізделген отбасылық ортаның маңызын атап өтті.
«АНА ҮЙІ» қоғамдық қорының аймақтық өкілі Тонтекова Калдар Жумабаевна отбасылық қиындықтарға тап болған азаматтарға қолдау көрсету бағыттары туралы айтып, қиын жағдайда жалғыз қалмай, тиісті мамандар мен ұйымдардың көмегіне жүгінудің қажеттігін түсіндірді.
Кездесу барысында жастар өздерін толғандырған сұрақтарын қойып, отбасылық қарым-қатынас, психологиялық қолдау, құқықтық қорғаныс және қиын жағдайдан шығу жолдары бойынша мамандардан жауап алды.
Мұндай кездесулер жастардың құқықтық және психологиялық сауаттылығын арттырып, отбасындағы өзара сыйластық пен жауапкершілік мәдениетін қалыптастыруға ықпал етеді. Сонымен қатар жастардың қауіп-қатерді ерте анықтап, өздерін және жақындарын қорғау бойынша қажетті ақпарат алуына мүмкіндік береді.
Іс-шара қорытындысында қатысушыларға отбасындағы татулық пен өзара құрметті сақтау, туындаған мәселелерді бейбіт жолмен шешуге ұмтылу және қажет болған жағдайда кәсіби көмекке дер кезінде жүгіну жөнінде ұсыныстар берілді.
