ADYM.KZ / Президент Қасым-Жомарт Тоқаев Жоғары аудиторлық палата төрағасы Әлихан Смайыловты қабылдап, ведомствоның 2026 жылдың алғашқы жартыжылдығындағы жұмысының қорытындысы туралы есебін тыңдады.
Кездесу барысында Әлихан Смайылов биылғы алғашқы алты айда жалпы сомасы 5,8 триллион теңгені қамтыған 13 ірі мемлекеттік аудит жүргізілгенін мәлімдеді.
Тексеру жұмыстары өңірлердің жергілікті атқарушы органдарын, «Проблемалық кредиттер қоры», «Аграрлық корпорация», «Қазпошта», «Ақтау теңіз порты» акционерлік қоғамдарын, денсаулық сақтау жүйесінің инфрақұрылымы мен бірқатар мемлекеттік органдарды қамтыған.
Аудит қорытындысы бойынша анықталған заңбұзушылықтар мен кемшіліктерді жою нәтижесінде мемлекеттік бюджетке 128 миллиард теңге қайтарылған. Сонымен қатар Үкіметке және аудит жүргізілген ұйымдарға 35 ұсыным мен 413 нұсқама жолданған.
Мемлекет басшысының бюджет үдерісін жетілдіру жөніндегі тапсырмаларын орындау аясында ұлттық заңнамаға бірқатар өзгеріс енгізілген. Атап айтқанда, макроэкономикалық болжамды қалыптастырудың жаңа тәртібі бекітіліп, мемлекеттік қаржының жұмсалуына қатысты қазыналық бақылау күшейтілген. Сондай-ақ жылдың төртінші тоқсанында бюджетке түзету енгізуге тыйым салынған.
Президентке жекешелендіру үдерісінің ашықтығы мен тиімділігін арттыру, сондай-ақ агроөнеркәсіп кешенін мемлекеттік реттеу тетіктерін жетілдіру бағытында атқарылып жатқан жұмыстар туралы да ақпарат берілді.
Әлихан Смайыловтың айтуынша, 2026 жылдың екінші жартыжылдығында 20 мемлекеттік аудитті аяқтау жоспарланып отыр. Оның төртеуі Мемлекет басшысының тікелей тапсырмасы бойынша жүргізіледі. Атап айтқанда, Шымкент қаласы, Қарағанды және Шығыс Қазақстан облыстарының қызметі, сондай-ақ фармацевтикалық өнім өндірушілерді қолдау тетіктері тексеріледі.
Бұдан бөлек, газ саласы, инвестициялық саясат, «Жасыл даму» АҚ, «ҚазАвтоЖол» ҰК» АҚ қызметі, жекелеген ұлттық жобалар мен «Ауыл – ел бесігі» жобасы да аудиттен өтеді.
Сонымен қатар Ұлттық құрылтаймен өзара іс-қимыл аясында 2027–2029 жылдарға арналған республикалық бюджет жобасына бағалау жүргізу жоспарланған.
Кездесу соңында Қасым-Жомарт Тоқаев мемлекеттік аудит жүйесін одан әрі жетілдіру, заманауи цифрлық шешімдер мен жасанды интеллект технологияларын кеңінен енгізу бағытында бірқатар нақты тапсырма берді.
