ADYM.KZ / Шымкент қаласында жастарды бұқаралық спортқа тарту, салауатты өмір салтын насихаттау және жастардың бос уақытын тиімді ұйымдастыру мақсатында «ReLife» жобасы аясында кіші футболдан турнир өтті.
Спорттық шара Шымкент қаласы Жастар саясаты басқармасының мемлекеттік әлеуметтік тапсырысы негізінде «Жалын» қоғамдық бірлестігінің ұйымдастыруымен өткізілді. Турнирге қаланың бес ауданынан 10 құрама команда қатысып, спорттық шеберліктерін ортаға салды.
Жарыстың негізгі мақсаты – жастар арасында спорт мәдениетін қалыптастыру, белсенді өмір салтын кеңінен насихаттау және жастардың дене белсенділігіне қызығушылығын арттыру. Сонымен қатар мұндай спорттық шаралар жастардың бос уақытын мазмұнды өткізуіне, жаңа орта қалыптастырып, өзара қарым-қатынас пен командалық мәдениетті нығайтуына мүмкіндік береді.
Турнир барысында командалар алаңда жоғары дайындық пен жеңіске деген жігерін көрсетті. Ойындар тартысты өтіп, қатысушылар өздерінің спорттық шеберлігімен қатар, командалық ұйымшылдығы мен өзара қолдау мәдениетін танытты. Әр кездесуде ойыншылар тәртіп пен спорттық әдеп қағидаттарын сақтап, нәтижеге жету жолындағы табандылығын көрсетті.
Мемлекет басшысы Қасым-Жомарт Кемелұлы Тоқаев жастар арасында еңбекқорлық, жауапкершілік, тәртіп және белсенді өмір салтын қалыптастырудың маңызын үнемі атап келеді. Осы тұрғыдан алғанда, жастарды спортқа кеңінен тарту – олардың денсаулығын нығайтумен қатар, жауапкершілік пен командалық жұмыс дағдыларын қалыптастыруға ықпал ететін маңызды бағыттардың бірі.
Жарыс қорытындысы бойынша үздік командалар анықталып, жеңімпаздар мен жүлдегерлер марапатталды. Марапаттау рәсіміне Шымкент қаласы Жастар саясаты басқармасының басшысы Әкімжан Әбдәкімов қатысып, турнирге қатысушыларды құттықтады.
Басқарма басшысы жастарды спортпен тұрақты түрде айналысуға шақырып, дене белсенділігінің салауатты өмір салтын қалыптастырудағы рөлін атап өтті. Сондай-ақ спорттың жастарды тәртіпке, жауапкершілікке, өзара қолдауға және командалық рухқа тәрбиелейтінін айтып, қатысушыларға мықты денсаулық, жаңа жетістіктер мен жарқын болашақ тіледі.
«ReLife» жобасы аясындағы мұндай бастамалар жастардың шығармашылық, спорттық және қоғамдық белсенділігін арттыруға бағытталған. Спорттық шаралар арқылы жастардың әлеуетін ашуға, бос уақытын тиімді ұйымдастыруға және салауатты өмір салтын күнделікті дағдыға айналдыруға жағдай жасалуда.
Жастардың спортқа қызығушылығын арттыруға бағытталған жұмыстар алдағы уақытта да жалғасын табады.
