ADYM.KZ / 19 шілдеде Корея Республикасының Пусан қаласында ЮНЕСКО-ның Дүниежүзілік мұра комитетінің 48-сессиясы өз жұмысын бастады. Қазақстан Сыртқы істер министрлігінің мәліметінше, халықаралық жиын 29 шілдеге дейін жалғасады.
Сессияның ашылу рәсіміне Корея Республикасының Президенті Ли Чжэ Мён мен ЮНЕСКО-ның бас директоры Халед Әл Анани қатысты. Биылғы басқосуға ЮНЕСКО-ның Дүниежүзілік мәдени және табиғи мұраны қорғау туралы конвенциясына қатысушы 196 мемлекеттен шамамен 3 мың делегат, халықаралық ұйымдар мен сарапшылар жиналды.
Комитет отырысында Дүниежүзілік мұралар тізіміне енгізуге ұсынылған 30 жаңа номинация қаралып, мұра нысандарының сақталу жай-күйіне қатысты 147 есеп талқыланады.
Қазақстан делегациясы Дүниежүзілік мұра комитетінің мүшесі ретінде сессия жұмысына қатысуда. Күн тәртібіндегі маңызды мәселелердің бірі – Қазақстан ұсынған «Маңғыстаудың жерасты мешіттері және олармен байланысты киелі нысандар» номинациясын қарау.
Еске сала кетейік, бұған дейін Атырауда өткен Ұлттық құрылтай отырысында Мемлекет басшысы Қасым-Жомарт Тоқаев Маңғыстаудағы бірегей жерасты мешіттерін ЮНЕСКО-ның Дүниежүзілік мұралар тізіміне енгізу жұмыстарын бастауды тапсырған болатын. Кейін Қазақстан аталған нысандарды ЮНЕСКО тізіміне енгізу жөнінде ресми өтінім жолдады.
