ADYM.KZ / Қазақстанда жаңа қалаға немесе облысқа қоныс аударуды жоспарлаған азаматтарға арналған жаңа цифрлық сервис іске қосылды. Енді migration.enbek.kz порталы арқылы пайдаланушылар өздерін қызықтыратын өңірдегі еңбек нарығы, тұрғын үй мүмкіндіктері және мемлекеттік қолдау шаралары туралы алдын ала ақпарат ала алады.
ҚР Еңбек және халықты әлеуметтік қорғау министрлігінің мәліметінше, сервис азаматтарға көшу туралы шешімді жан-жақты бағалап, жаңа өңірдегі мүмкіндіктермен алдын ала танысуға мүмкіндік береді.
Порталда өңірлердегі бос жұмыс орындары, сұранысқа ие мамандықтар, тұрғын үйге қатысты ақпарат және мемлекеттік қолдау тетіктері ұсынылған. Сонымен қатар еңбек нарығындағы өзгерістерге сәйкес мамандықтар тізімі тұрақты түрде жаңартылып отырады.
Қазіргі уақытта денсаулық сақтау, білім беру, инженерлік-техникалық сала, ауыл шаруашылығы, көлік, құрылыс және әлеуметтік бағыттағы мамандарға сұраныс жоғары. Атап айтқанда, дәрігерлер, мейіргерлер, мұғалімдер, инженерлер, агрономдар, ветеринарлар, жүргізушілер, механизаторлар, электр мамандары, дәнекерлеушілер, токарьлар, құрылысшылар, бухгалтерлер мен экономистер қажет.
Сервистің интерактивті картасында елді мекендердің орналасуы, әлеуметтік нысандар, инфрақұрылым және кеңес беретін ұйымдардың байланыс деректері де көрсетілген.
Еске түсірсек, 2026 жылы ерікті қоныс аудару бағдарламасына Абай, Шығыс Қазақстан, Қарағанды, Қостанай, Павлодар, Солтүстік Қазақстан және Ұлытау облыстары енгізілді.
Жаңа сервис азаматтарға өз мамандығына сұраныс жоғары өңірді таңдауға, жұмысқа орналасу мүмкіндігін алдын ала бағалауға және қоныс аудару кезінде көрсетілетін мемлекеттік қолдау туралы толық ақпарат алуға мүмкіндік береді.
