ADYM.KZ / Шымкент қаласы жастар саясаты басқармасының «Жастар ресурстық орталығы» КММ-нің ұйымдастыруымен Сайрам медициналық колледжінде этносаясат және деструктивті діни ағымдардың алдын алу мәселелеріне арналған ақпараттық-түсіндірме кездесу өтті.
Іс-шараның негізгі мақсаты – жастардың этносаралық қатынастар, зайырлы қоғам құндылықтары және діни сауаттылық жөніндегі түсінігін кеңейту, қоғамдағы өзара құрмет пен келісім мәдениетін нығайту, сондай-ақ діни радикализм мен деструктивті ағымдардың ықпалына қарсы иммунитет қалыптастыру.
Кездесуге «Жастар ресурстық орталығының» аутрич және NEET жастармен жұмыс бөлімінің маманы Құрманғазы Лаура, «Қоғамдық келісім» КММ жанындағы Медиация кеңесінің мүшесі, кәсіби медиатор Шамирзаев Аббас Ахмадшаевич және Шымкент қаласы Дін істері басқармасының «Дін мәселелерін зерттеу орталығы» КММ-нің теолог маманы Әбдіманап Нұрхан қатысты.
Кездесу барысында мамандар зайырлы қоғамның ерекшеліктері мен негізгі құндылықтарына тоқталды. Студенттерге қоғамдағы түрлі этнос пен конфессия өкілдерінің өзара сыйластық жағдайында өмір сүруінің маңызы түсіндірілді.
Мамандар қоғамдық келісім мен тұрақтылықты сақтау әр азаматтың жауапкершілігіне байланысты екенін атап өтті. Әртүрлі көзқарастар мен мәдени ерекшеліктерге құрметпен қарау, өзара түсіністік пен диалог орнату – қоғамдағы татулықты нығайтудың маңызды шарттары екені айтылды.
Этносаралық қарым-қатынастарда дау-дамайды ушықтырмай, мәселені өзара түсіністік пен келісім арқылы шешудің маңызына да назар аударылды.
Кездесудің негізгі бағыттарының бірі – жастардың діни сауаттылығын арттыру болды. Теолог маман студенттерге діни ақпаратты қабылдау кезінде сыни ойлау мен ақпарат көздерінің сенімділігіне назар аударудың қажеттігін түсіндірді.
Қазіргі ақпараттық кеңістікте діни мазмұндағы түрлі материалдар әлеуметтік желілер мен интернет ресурстарында кең таралады. Осыған байланысты жастарға кез келген ақпаратқа бірден сенбей, оның дереккөзін тексеру және мәселеге қатысты білікті мамандардың пікіріне жүгіну маңызды екені айтылды.
Сонымен қатар діни сауаттылық адамның діни көзқарасын дұрыс қалыптастырумен қатар, жалған ақпарат пен манипуляциялық мазмұнды ажырата білуге мүмкіндік беретіні түсіндірілді.
Мамандар жастарға деструктивті діни ағымдардың ықпалына түсудің алдын алу мәселелері бойынша да ақпарат берді. Әсіресе интернеттегі күмәнді діни контентке, белгісіз тұлғалардың үгіт-насихатына және адамның санасына ықпал етуге бағытталған ақпаратқа сақтықпен қараудың маңызы атап өтілді.
Жастардың діни сауаттылығын арттыру, сыни ойлау қабілетін дамыту және ақпаратты саралай білу дағдыларын қалыптастыру мұндай қауіптердің алдын алуда маңызды рөл атқаратыны айтылды.
Мамандар қандай да бір күмәнді жағдайда мәселені өз бетінше шешуге тырыспай, тиісті сала мамандарына жүгінудің маңызын да түсіндірді.
Кәсіби медиатор Аббас Шамирзаев өз кезегінде адамдар арасындағы өзара түсіністік пен диалогтың маңызына тоқталды. Қоғамдық ортада түрлі пікірдің болуы табиғи құбылыс болғанымен, кез келген мәселені өркениетті диалог арқылы шешудің маңызы жоғары екені айтылды.
Жастарға дау туындаған жағдайда эмоцияға берілмей, қарсы тараптың пікірін тыңдау, мәселенің мәнін түсінуге тырысу және ортақ шешім іздеу қажеттігі түсіндірілді.
Кездесу соңында студенттер этносаралық қатынастар, діни сауаттылық, интернеттегі діни ақпарат және деструктивті ағымдардың алдын алу мәселелері бойынша өздерін қызықтырған сұрақтарын қойды.
Мамандар жастардың сауалдарына жауап беріп, құқықтық және ақпараттық тұрғыдан дұрыс шешім қабылдаудың маңызын түсіндірді.
Осындай ақпараттық-түсіндіру кездесулері жастардың қоғамдық мәселелерге деген жауапкершілігін арттырып, этносаралық келісім мен өзара құрмет мәдениетін нығайтуға ықпал етеді. Ал діни сауаттылықты арттыру – жастардың ақпараттық кеңістікте саналы таңдау жасап, түрлі теріс ықпалдардан қорғануына мүмкіндік беретін маңызды бағыттардың бірі.
