ADYM.KZ / Шымкент қаласындағы Арбат алаңында «Халық заңгері» республикалық акциясы өтіп, тұрғындарға тегін заңгерлік кеңес берілді. Іс-шараға қалалық басқармалар мен әкімдіктердің мамандары, заңгер-консультанттар, адвокаттар, жеке сот орындаушылары және прокурорларды қоса алғанда, 40-қа жуық маман қатысты. Олар азаматтардың өтініштерін тыңдап, құқықтық мәселелер бойынша түсініктеме берді.
Акция барысында тұрғындар тұрғын үй және жылжымайтын мүлік құжаттарын рәсімдеу, әлеуметтік төлемдер, алимент өндіру, алаяқтық және басқа да мәселелер бойынша кеңес алды. Мамандар әрбір өтінішті жеке қарастырып, заңнама аясында шешу жолдарын түсіндірді.
Әл-Фараби ауданы прокуратурасы бөлімінің прокуроры Мерей Айжанованың айтуынша, азаматтар көбіне тұрғын үй мен жылжымайтын мүлікке қатысты сұрақтармен жүгінеді. Сонымен қатар соңғы уақытта кибералаяқтық, қаржылық алаяқтық және дропперлікке байланысты мәселелер де жиі көтеріліп жүр.
«Шымкент тұрғындары түрлі мәселелер бойынша жүгінеді. Алайда ең көп қойылатын сұрақтар тұрғын үй және жылжымайтын мүлік құжаттарын рәсімдеуге қатысты. Сондай-ақ кибералаяқтық, алаяқтық және дропперлік мәселелері де жиі көтеріледі. Бұдан бөлек, алимент өндіруге көмек сұрап жүгінетіндер бар. Кейбір азаматтарға барлық құжаттарымен аудан прокуратурасына келуді ұсынамыз. Сол жерде туындаған мәселелерді нақты әрі жан-жақты қарастыруға мүмкіндік бар. Бір күннің өзінде аудан прокуратурасына түрлі мәселелер бойынша шамамен 30 адам жүгінеді», – дейді Мерей Айжанова.
Акцияға қатысқан мемлекеттік және жергілікті атқарушы органдардың өкілдері де тұрғындарға өз бағыттары бойынша кеңес берді. Атап айтқанда, Жұмыспен қамту және әлеуметтік қорғау басқармасының қызметкерлері әлеуметтік жәрдемақыларды тағайындау мен төлеу тәртібін түсіндірді.
Тұрғындар тарапынан көпқабатты үйлердің маңында кәсіпкерлік нысандарын салуға байланысты жер даулары да көтерілді. Мамандар тұрғындар мен кәсіпкерлер арасындағы осындай мәселелерді заң аясында шешу жолдары жөнінде түсініктеме берді.
«Халық заңгері» акциясы бірнеше жылдан бері еліміздің азаматтарына тегін құқықтық көмек көрсетіп келеді. Оның басты ерекшелігі – тұрғындар әртүрлі мекемелерге бармай-ақ, бір алаңда бірнеше саланың маманынан кеңес ала алады. Мұндай шаралар халықтың құқықтық сауаттылығын арттырып, азаматтардың өз құқықтары мен заңды мүдделерін қорғауына мүмкіндік береді.
