ADYM.KZ / Шымкент қаласында жастар арасында нашақорлықтың алдын алу, есірткі заттарының зияны туралы ақпараттандыру және салауатты өмір салтын қалыптастыру бағытындағы профилактикалық жұмыстар жалғасуда.
Шымкент қаласы жастар саясаты басқармасының ұйымдастыруымен «Шымкент қаласының жастары арасында нашақорлықтың алдын алу» жобасы аясында мектеп оқушыларымен ақпараттық-түсіндіру кездесуі өтті.
Іс-шараның негізгі мақсаты – жасөспірімдерге есірткі заттарының адам денсаулығы мен өміріне тигізетін зардабын жан-жақты түсіндіру, олардың зиянды әдеттерге қарсы тұру дағдыларын қалыптастыру және салауатты өмір салтын ұстануға ынталандыру.
Кездесуге жоба координаторы, «Шаңырақ» қоғамдық бірлестігінің басшысы С. Байзахова және психолог А. Тұрсынбаева қатысып, оқушыларға нашақорлықтың алдын алу және оның қауіпті салдары туралы арнайы лекция өткізді.
Мамандардың айтуынша, жасөспірімдік кезеңде қоршаған ортаның, достардың және әлеуметтік ортаның ықпалы ерекше сезіледі. Сондықтан жастарға есірткінің зияны туралы тек ақпарат беріп қана қоймай, кез келген күмәнді ұсынысты қабылдамай, өз таңдауына жауапкершілікпен қарау дағдыларын қалыптастыру маңызды.
Кездесу барысында есірткі заттарының адам ағзасына тигізетін кері әсері кеңінен түсіндірілді. Оның денсаулыққа ғана емес, адамның психологиялық жағдайына, әлеуметтік ортасына, оқуына, қарым-қатынасына және болашақтағы өміріне де елеулі қауіп төндіретіні айтылды.
Сонымен қатар оқушыларға есірткіге тәуелділіктің қалай қалыптасатыны, зиянды әдеттердің алдын алу жолдары және қиын жағдайға тап болған кезде дер кезінде мамандардың көмегіне жүгінудің маңызы түсіндірілді.
Психолог А. Тұрсынбаева жасөспірімдермен еркін форматта жұмыс жүргізіп, түрлі өмірлік жағдайларда дұрыс шешім қабылдау мәселесіне тоқталды. Әсіресе қатарластары тарапынан болуы мүмкін жағымсыз ұсыныстарға «жоқ» деп айта білу, өз ұстанымын қорғай алу және эмоциялық қысымға берілмеу қажеттігі айтылды.
Маман оқушыларға өз ортасын дұрыс таңдаудың да маңызды екенін атап өтті. Өйткені адамның күнделікті араласатын ортасы оның мінез-құлқына, әдетіне және шешім қабылдауына әсер етуі мүмкін. Осы ретте жастарға бос уақытын пайдалы өткізуге, спортпен шұғылдануға, шығармашылықпен айналысуға және қоғамдық бастамаларға белсенді қатысуға кеңес берілді.
Кездесуде есірткіге қатысты заңнамалық жауапкершілік мәселелері де назардан тыс қалмады. Жасөспірімдерге есірткі заттарын тарату, сақтау немесе өзге де заңсыз әрекеттердің құқықтық салдары түсіндіріліп, кез келген күмәнді жағдайдан аулақ болудың маңызы айтылды.
Мұндай ақпараттық-түсіндіру кездесулері жастардың есірткіге қатысты дұрыс көзқарасын қалыптастыруға, қауіптің алдын алуға және салауатты өмір салтын таңдауға ықпал етеді.
Жастардың дені сау, саналы әрі жауапкершілігі жоғары азамат болып қалыптасуы – қоғамның ортақ міндеті. Сондықтан нашақорлықтың алдын алу бағытындағы жүйелі профилактикалық жұмыстарды жүргізу, жасөспірімдермен ашық диалог орнату және оларға қажетті ақпарат пен психологиялық қолдау көрсету өзекті болып қала береді.
Жоба аясындағы кездесулер алдағы уақытта да жалғасып, қала жастары арасында есірткінің алдын алу, салауатты өмір салтын насихаттау және құқықтық сауаттылықты арттыру бағытындағы жұмыстарды қамтитын болады.
