ADYM.KZ / Президент Қасым-Жомарт Тоқаев Шанхайдағы жұмыс сапары аясында Таиланд Премьер-министрі Анутин Чарнвиракулмен кездесті.
Кездесу барысында Мемлекет басшысы Қазақстанның Таиландты Азиядағы негізгі серіктестерінің бірі ретінде қарастыратынын айтып, екі ел арасындағы экономикалық ынтымақтастықтың әлеуетіне жоғары баға берді.
Ақорданың мәліметінше, биылғы төрт айдың қорытындысы бойынша Қазақстан мен Таиланд арасындағы тауар айналымы өткен жылдың сәйкес кезеңімен салыстырғанда 76 пайызға өсіп, 110 миллион доллардан асты.
Президенттің айтуынша, бұл көрсеткішті одан әрі ұлғайтуға мүмкіндік мол. Әсіресе, аграрлық өнімдер экспортын арттыру арқылы өзара сауда көлемін едәуір көбейтуге болады.
Қасым-Жомарт Тоқаев кәсіпкерлер үшін қолайлы жағдай қалыптастыру мақсатында екі ел үкіметтері арасындағы өзара іс-қимылды жандандыруды ұсынды. Сондай-ақ туризм саласындағы ынтымақтастықтың маңызын атап өтті.
Президенттің сөзінше, Таиланд қазақстандық туристер ең көп таңдайтын бағыттардың бірі саналады. Былтыр бұл елге 150 мыңнан астам Қазақстан азаматы барған. Сонымен қатар Қазақстан да Таиланд азаматтарына, оның ішінде қысқы туризм бағытында тартымды демалыс мүмкіндіктерін ұсына алады.
Өз кезегінде Таиланд Премьер-министрі Анутин Чарнвиракул екіжақты ынтымақтастықты өзара мүддеге сай барлық бағытта дамытуға ниетті екенін жеткізді. Оның айтуынша, экономика, сауда, цифрландыру және туризм салаларындағы әріптестікті жаңа деңгейге көтеруге мүмкіндік бар.
Кездесу соңында Президент Қасым-Жомарт Тоқаев Анутин Чарнвиракулды Қазақстанға ресми сапармен келуге шақырды.
