ADYM.KZ / Орталық Азия Инновациялық университетінде Мемлекет басшысы Қасым-Жомарт Кемелұлы Тоқаевтың «Әділетті қоғамға – шыншыл сөз» атты кітабын талқылауға арналған тағылымды кездесу өтті.
Жиынның негізгі мақсаты – жастардың кітап оқуға қызығушылығын арттыру, мемлекет пен қоғамның дамуына қатысты өзекті мәселелерді талқылау және жас буынның ел болашағына қатысты азаматтық көзқарасын қалыптастыру.
«Әділетті қоғамға – шыншыл сөз» жинағына Мемлекет басшысының әр жылдары айтқан таңдаулы сөздері мен ой-тұжырымдары енгізілген. Басылым 1994 жылдан бергі отыз жылдан астам кезеңді қамтиды. Кітаптағы материалдар 21 тақырыптық бағыт бойынша жүйеленіп, мемлекет пен қоғамның дамуы, заң мен тәртіп, білім мен ғылым, мәдениет, ұлттық құндылықтар, жастар, цифрландыру және басқа да өзекті мәселелерді қамтиды.
Кездесуге Орталық Азия Инновациялық университетінің ректоры Ерлан Зүлмәтұлы Оңласынов, «Жастар ресурстық орталығы» КММ басшысы Жансерік Бауыржанұлы Жұман, PhD, философия докторы, қауымдастырылған профессор м.а. Айгерім Тойлыбаевна Өзенбаева және жас ғалым, абайтанушы, докторант, Мұхтар Әуезов атындағы Оңтүстік Қазақстан университетінің баспасөз хатшысы Әзімхан Үсенұлы Исабек қатысты.
Басқосу барысында кітапта көтерілген мәселелердің бүгінгі қоғам үшін маңызына назар аударылды. Әсіресе әділеттілік, заңға құрмет, қоғамдық жауапкершілік, білім мен ғылымның рөлі, ұлттық құндылықтар және жастардың ел дамуындағы орны төңірегінде ой-пікірлер ортаға салынды.
Қатысушылар кітаптағы әр кезеңге қатысты ой-тұжырымдарды талқылай отырып, қоғамның дамуымен бірге азаматтың жауапкершілігі де арта түсетінін атап өтті. Әділетті қоғам қалыптастыру мәселесі тек мемлекеттік институттардың міндеті емес, әр азаматтың күнделікті ұстанымы мен іс-әрекетіне де байланысты екені айтылды.
Жастардың пікіріне де ерекше мән берілді. Студенттер елдің болашағы, білім алудың маңызы, қоғамдық белсенділік және азаматтық жауапкершілік жөніндегі өз ойларын ортаға салып, кітапта қамтылған мәселелерге қатысты пікір алмасты.
Кездесуде кітаптың жастар үшін берер тағылымы да сөз болды. Қоғамдағы өзгерістерді түсіну, ел тарихына зер салу, мемлекет дамуының түрлі кезеңдеріне қатысты ойларды саралау және өз ұстанымын қалыптастыру үшін мұндай еңбектердің маңызы атап өтілді.
Сонымен қатар бүгінгі жас ұрпақ үшін білім мен ғылымға ұмтылу, еңбекқорлық, заңды құрметтеу, ұлттық құндылықтарды сақтау және қоғам алдындағы жауапкершілікті сезіну секілді ұстанымдардың өзектілігі айтылды.
Жиын барысында қатысушылар кітапты бір ғана таныстырылым аясында қалдырмай, ондағы ойларды жастар арасында кеңінен талқылаудың маңыздылығына тоқталды. Себебі кітаптағы материалдар елдің қоғамдық-саяси және әлеуметтік дамуына қатысты әр жылдардағы пікірлерді жүйелі түрде қарастыруға мүмкіндік береді.
Кездесу соңында жастар өздерін қызықтырған сұрақтарын қойып, сарапшылармен және мамандармен еркін пікір алмасты. Басқосу студенттердің кітапқа деген қызығушылығын арттырып, ел дамуы, әділеттілік, адамгершілік және азаматтық жауапкершілік мәселелері туралы ойларын ортаға салуға мүмкіндік берді.
Жалпы, мұндай кездесулер жастардың кітап оқу мәдениетін қалыптастырып қана қоймай, қоғамдағы өзекті мәселелерді талдауға, түрлі пікірлерді тыңдауға және азаматтық көзқарасын қалыптастыруға ықпал етеді.
