ADYM.KZ / Алматыда заңсыз интернет-казинолардың қызметін қамтамасыз еткен адамдар тобының әрекеті әшкереленді. Бұл туралы Қаржылық мониторинг агенттігінің баспасөз қызметі хабарлады.
Тергеу мәліметінше, күдіктілер «Olymp Casino», «Rukh Poker» және «7Kcasino» интернет-казиноларының төлем жүйесін ұйымдастырған. Атап айтқанда, ойыншылардан қаражат қабылдау және оны өңдеу үшін Rocket.do онлайн-платформасы пайдаланылған.
ҚМА ресми өкілі Ернар Тайжанның айтуынша, күдіктілердің бірі шетел азаматы болған. Ол өз банк шоттарын пайдалануға беретін адамдарды іздеп, оларға 200 АҚШ долларына дейін сыйақы ұсынған.
«Дропперлерді Қазақстанға әкеліп, ЖСН рәсімдеу үшін ХҚКО-ға ертіп барған. Кейін банк бөлімшелеріне апарып, шот аштырған. Нәтижесінде күдікті 15 шетел азаматының банк шоттарына қол жеткізген. Сонымен қатар өзінің банк шотын да пайдалануға берген», – деді Ернар Тайжан.
Ведомствоның мәліметінше, ойыншылардан 16 дроппердің банк шоттарына түскен қаражаттың жалпы көлемі 110 млн теңгеден асқан.
Қылмыстық іс аясында күдіктілердің бірі қамауға алынған. Тағы үш адамға ешқайда кетпеу және тиісті мінез-құлық туралы қолхат түріндегі бұлтартпау шарасы қолданылды.
Қылмыстық іс сотқа жолданды. Тергеуге қатысты өзге ақпарат Қазақстан Республикасы Қылмыстық-процестік кодексінің 201-бабына сәйкес жарияланбайды.
