Қазақстанда егін жинау науқаны жалғасып жатыр. Бүгінде 5,5 млн гектар дәнді дақыл орылып, бұл жалпы егіс алқабының 35,5%-ын құрады. Аталған көрсеткіш өткен жылдың сәйкес кезеңімен салыстырғанда шамамен екі есе жоғары, деп хабарлайды Adym.kz ақпараттық сайты Үкіметке сілтеме жасап.
Ауыл шаруашылығы министрлігінің мәліметінше, орташа өнімділік гектарына 14 центнерді құраған. Нәтижесінде шаруалар қазірдің өзінде 7,7 млн тонна астық жинады. Былтыр осы кезеңде 3,9 млн тонна астық жиналған болатын.
Жаңа өнімнің сапасы да жоғары деңгейде. Бүгінде лицензияланған астық қабылдау кәсіпорындарына 1 млн тоннадан астам, нақтырақ айтқанда 1 025,2 мың тонна астық қабылданды. Бұл өткен жылдың сәйкес кезеңіндегі көрсеткіштен жеті есе көп. 2025 жылы осы уақытта сақтауға 145,5 мың тонна астық қабылданған еді.
Қабылданған жұмсақ бидайдың басым бөлігі жоғары сапалы болып отыр. Зерттеу нәтижесіне сәйкес, бидайдың 78%-ы үшінші сыныпқа, 14%-ы төртінші сыныпқа жатқызылды. Ал бесінші сыныпты және сыныпқа жатпайтын бидайдың үлесі 7%-ды құрады.
Жаңа өнімдегі глютен мөлшері де жоғары. Жиналған жұмсақ бидайдың 56%-ында глютен мөлшері 28%-дан асады. Тағы 19%-ында бұл көрсеткіш 25-27%, ал қалған 25%-ында 23-24% деңгейінде.
Министрлік астық қабылдау кәсіпорындарына түсіп жатқан өнімнің сапасына, сыныптылығына және негізгі физика-химиялық көрсеткіштеріне тұрақты мониторинг жүргізіп отыр.
Сонымен қатар майлы және көкөніс-бақша дақылдарын жинау жұмыстары да жалғасуда. Қазіргі уақытта 244 мың тонна май тұқымы, 1,9 млн тоннадан астам көкөніс, 1,7 млн тонна бақша дақылдары және 795 мың тонна картоп жиналды.
Егіннің жай-күйін бақылау үшін арнайы жұмыс тобы құрылып, өңірлерде көшпелі тексерулер жүргізуде. Жергілікті атқарушы органдардың мәліметінше, дәнді және майлы дақылдардың 98%-ы жақсы және қанағаттанарлық жағдайда.
Егін жинау науқанын уақытылы жүргізу үшін өңірлерге 401,1 мың тонна дизель отыны бөлінді. Оның 161,3 мың тоннасына шарт жасалып, төлем жүргізілген. Бұл бөлінген көлемнің 40%-ына тең. Қазіргі таңда 143 мың тонна дизель отыны, яғни жоспарланған көлемнің 36%-ы жөнелтілді.
Шаруаларды минералды тыңайтқыштармен қамтамасыз ету жұмыстары да жүргізілуде. 2026 жылға жоспарланған 2,3 млн тонна тыңайтқыштың 2 млн тоннасы бойынша келісімшарт жасалып, өнім жөнелтілді. Бұл жылдық жоспардың 85%-ын құрайды.
Ауыл шаруашылығы министрлігінің мәліметінше, егін жинау науқаны штаттық режимде жүріп жатыр. Егін жинау қарқыны, алқаптардың жай-күйі, шаруаларды қажетті ресурстармен қамтамасыз ету, сондай-ақ астықтың көлемі мен сапасы тұрақты бақылауда.
