ADYM.KZ / Шымкентте Отбасы күніне орай жас отбасылар арасында «ОТАУ IQ» интеллектуалдық сайысы өтті. Шара Шымкент қаласы әкімдігінің қолдауымен, Жастар саясаты басқармасының ұйымдастыруымен «Бақыт мекені» жобасы аясында өткізілді.
Интеллектуалдық сайыстың негізгі мақсаты – отбасылық құндылықтарды дәріптеу, ерлі-зайыптылар арасындағы өзара түсіністік пен сыйластықты арттыру, сондай-ақ жас отбасылардың бос уақытын мазмұнды ұйымдастыру.
QUIZ форматында өткен жарысқа жас отбасылардан құралған командалар қатысты. Сайыс алты кезеңнен тұрып, қатысушыларға барлығы 42 зияткерлік, логикалық және танымдық сұрақ ұсынылды.
Ерекшелігі – тапсырмаларды қатысушылар жеке емес, отбасымен бірге талқылап, ортақ шешім қабылдады. Осы арқылы сайыс білім мен логикалық ойлауды ғана емес, жұптардың бірлесіп әрекет ету, бір-бірінің пікірін тыңдау және шешім қабылдау қабілетін де сынады.
Ұйымдастырушылардың айтуынша, мұндай формат жас отбасылардың қарым-қатынасын нығайтып, өзара қолдау мен сенім мәдениетін қалыптастыруға ықпал етеді. Сонымен қатар жастардың бос уақытын пайдалы әрі мазмұнды өткізуіне мүмкіндік береді.
Сайыс қорытындысы бойынша Уәлхановтар отбасы I орынға ие болды. Пазылдар және Шәріпбайлар отбасылары II орын, ал Ділдәбековтар, Шаниязовтар және Мансуровтар отбасылары III орын алды.
Жеңімпаздар мен жүлдегерлерге арнайы сыйлықтар табысталды.
Отбасы институтын нығайтуға бағытталған мұндай мәдени-танымдық шаралар жастар арасында өзара сыйластық, жауапкершілік, бірлік және қолдау құндылықтарын дәріптеуге мүмкіндік береді.
«ОТАУ IQ» сайысы да жас отбасылардың бірге уақыт өткізіп, білімін ортаға салып, ортақ мақсатқа бір команда ретінде ұмтылуына жағдай жасады.
Мықты отбасы – берік қоғамның негізі. Сондықтан отбасылық құндылықтарды насихаттап, жас отбасыларды қолдауға бағытталған жобалардың маңызы зор.
