ADYM.KZ / Қазақстан мен Қытай түсті металлургия саласындағы өндірістік ынтымақтастықты кеңейтіп, толық өнеркәсіптік тізбек бойынша бірлескен жобаларды дамытуға ниетті. Бұл туралы Қазақстан–Қытай түсті металлургияны орнықты дамыту форумында Қытай түсті металлургия өнеркәсібі қауымдастығы төрағасының орынбасары Цзя Минсинь мәлімдеді.
Оның айтуынша, екі ел арасындағы металлургия саласындағы өзара іс-қимыл үш негізгі бағыт бойынша дамиды. Олар – өндірістік ынтымақтастықты тереңдету, кадр даярлау мен тәжірибе алмасу және салалар арасындағы үйлесімді ықпалдастықты күшейту.
Цзя Минсиньдің сөзінше, 2025 жылы Қазақстан мен Қытай арасындағы тауар айналымы 48 млрд АҚШ долларынан асып, өнеркәсіптік кооперацияны кеңейтуге берік негіз қалыптастырған. Қытайлық инвестициялар бүгінде металлургия, кадр даярлау және өндірістік тізбекті дамыту бағыттарын қамтып отыр.
Форумда қытайлық кәсіпорындардың Қазақстандағы өндірісті жергіліктендіруге басымдық беріп отырғаны айтылды. Қазіргі уақытта олардың мыс өндіру көлемі 300 мың тоннаға жеткен. Сондай-ақ катодты мыс өндірісі де тұрақты өсім көрсетіп келеді.
Спикердің айтуынша, Zijin Mining компаниясының Богуты жобасы екі ел арасындағы стратегиялық өнеркәсіптік ынтымақтастықтың жарқын үлгілерінің бірі саналады. Жоба аясында геологиялық барлау, кен өндіру және кадр даярлау жұмыстары жүргізілуде.
Сонымен қатар тараптар кәсіби мамандардың біліктілігін арттыру, жасыл тау-кен өндірісін дамыту, цифрлық технологиялар мен жасанды интеллектті енгізу бағытындағы тәжірибе алмасуды күшейтуге ниетті.
Цзя Минсинь сондай-ақ трансшекаралық теміржол инфрақұрылымы, стратегиялық серіктестік және логистикалық мүмкіндіктер екі ел арасындағы өнеркәсіптік кооперацияны дамытуға қосымша серпін беретінін атап өтті.
Оның пікірінше, Қазақстанның минералдық ресурстар қоры мен Қытайдың технологиялық, өндірістік және қаржылық әлеуеті өзара тиімді серіктестікті жаңа деңгейге көтеруге мүмкіндік береді.
Сөз соңында Қытай өкілі тараптар түсті металлургия саласындағы ынтымақтастықты одан әрі тереңдетуге және тұрақты дамуды қамтамасыз етуге дайын екенін жеткізді. Оның айтуынша, бұл бастамалар «Бір белдеу, бір жол» аясындағы өзара тиімді әріптестіктің жаңа кезеңін қалыптастыруға ықпал етеді.
