ADYM.KZ / Астанада «AIU 2026 – Елорда жүрегінде» халықаралық жазғы мектебінің жабылу рәсімі өтті. Осыған орай Астана Халықаралық университетінде жобаның қорытынды іс-шарасы ұйымдастырылды.
Салтанатты рәсім барысында әлемнің 10-нан астам елінен келген студенттер ұлттық киімдерін таныстырып, өз елдерінің мәдениеті туралы баяндады. Сонымен қатар жобаға қатысушылар мен шетелдік дипломатиялық өкілдіктердің өкілдері халықаралық жазғы мектептің маңыздылығына тоқталып, алған әсерлерімен бөлісті. Ұйымдастырушылар бұл бастаманы алдағы жылдары да жалғастыруды жоспарлап отырғанын жеткізді.
Халықаралық жазғы мектеп 5 шілдеде басталды. Оған Қытай, Вьетнам, Ресей, Германия, Италия, Беларусь, Өзбекстан, Қырғызстан, Камбоджа, Непал және басқа да мемлекеттерден келген студенттер қатысты.
Он күнге созылған бағдарлама аясында қатысушылар қазақ тілінің негіздерін меңгеріп, ұлттық мәдениетпен танысты. Сондай-ақ асық ату, арқан тарту және тоғызқұмалақ сияқты ұлттық ойындарды үйреніп, Қазақстан Ұлттық музейін аралады. Бұдан бөлек, киіз үй мәдениеті, қазақ халқының дәстүрлі тұрмыс-тіршілігі туралы мәлімет алып, елорданың тарихи және мәдени орындарын тамашалады.
Бағдарлама соңында студенттер ұлттық ойындар бойынша өзара сайысқа түсіп, халықаралық командалар құрамында өнер көрсетті. Жоба шетелдік жастардың Қазақстанның мәдениеті мен дәстүрін тереңірек тануына, сондай-ақ түрлі елдердің жастары арасындағы мәдени байланыстарды нығайтуға ықпал етті.
Қытайдың Цзянсу провинциясындағы Цзянсу Мұхит университетінің студенті Цзычен Лю жобаның жоғары деңгейде ұйымдастырылғанын атап өтті.
– Халықаралық жазғы мектеп өте жоғары деңгейде ұйымдастырылды. Осы бастамаға үлес қосқан барлық азаматтарға алғысымды білдіремін. Маған қазақтың дәстүрлері мен ұлттық ойындары ерекше ұнады. Кейбір ойындарда командалық жұмыстың маңызы айқын байқалады. Біз төрт топқа бөлініп жарысып, жақсы нәтиже көрсеттік. Әсіресе, арқан тарту мен асық ату ойындары ерекше әсер қалдырды, – деді ол.
Айта кетейік, жобаны Астана Халықаралық университеті мен Қытайдың Халықаралық бизнес және экономика университеті жанындағы Қазақстан–Қытай экономика және сауда институты бірлесіп ұйымдастырды. Бастамаға халықаралық серіктес жоғары оқу орындары да қолдау көрсетті.
