ADYM.KZ / Ресей ғалымдары дәріге төзімді бактерияларға қарсы тиімді препараттарды анықтау процесін жеделдететін жаңа технология әзірледі. Жаңа тест жүйесі антибиотиктерді іздеу уақытын қысқартып, олардың әсер ету механизмін бір мезгілде анықтауға мүмкіндік береді.
Зерттеуді Сколково ғылым және технологиялар институтының (Сколтех) және басқа да ғылыми орталықтардың мамандары жүргізді. Әзірленген жүйе грамтеріс бактерияларда, соның ішінде қауіпті көк ірің таяқшасында РНҚ синтезін бұзатын қосылыстарды жылдам анықтай алады.
Ғалымдардың айтуынша, технология перспективалы заттарды іріктеп қана қоймай, олардың бактерияларға қалай әсер ететінін де көрсетеді. Бұл жаңа дәрілерді әрі қарай жетілдіру мен тиімділігін арттыруға мүмкіндік береді.
Зерттеу жетекшісі Дмитрий Лукьяновтың сөзінше, препараттың әсер ету механизмін білу оның жұмыс істеу принципін тереңірек зерттеуге және қажет болған жағдайда химиялық құрылымын жетілдіруге жол ашады.
Ал зерттеудің алғашқы авторы Антон Иззи жаңа жүйенің антибиотиктің рибосомаларға, ДНҚ немесе РНҚ синтезіне әсерін ажырата алатынын атап өтті. Оның айтуынша, бұл антибиотиктерді зерттеу барысында қажетті ақпаратты әлдеқайда жылдам алуға мүмкіндік береді.
Жүйенің негізіне зертханалық ішек таяқшасының арнайы штамы алынған. РНҚ синтезі бұзылған кезде белгілі бір ген белсеніп, бұл өзгерістер ПТР-тест арқылы тіркеледі.
Зерттеушілердің пікірінше, жаңа әдіс антибиотиктерді әзірлеудің бастапқы кезеңіндегі зерттеулерді айтарлықтай жеделдетеді. Бұған дейін мұндай жұмыстар молекулалардың құрылымын талдауды және қосымша тәжірибелер жүргізуді талап ететін.
Мамандар антибиотиктерді ұзақ уақыт және бақылаусыз қолдану салдарынан бактериялардың дәріге төзімділігі артып келе жатқанын ескертеді. Соңғы жылдары көк ірің таяқшасы мен алтын түсті стафилококк сияқты қауіпті микроорганизмдердің көптеген антибиотикке төзімділігі күшейген.
Зерттеу нәтижелері халықаралық ғылыми журналда жарияланды.
