ADYM.KZ / Премьер-министр Олжас Бектенов Өнеркәсіп министрлігіне бір ай ішінде Қазақстанда автобөлшектер өндірісін дамытуға арналған нақты жоспар әзірлеуді тапсырды.
Үкімет отырысында сөз сөйлеген Премьердің айтуынша, машина жасау саласы экономиканы әртараптандыруға және оның тұрақты дамуына ықпал ететін негізгі бағыттардың бірі. Осыған байланысты Мемлекет басшысы отандық автомобиль өнеркәсібін жоғары технологиялық салаға айналдыру міндетін қойған.
Олжас Бектеновтің айтуынша, елімізде халықаралық талаптарға сай автобөлшектердің жергілікті өндірісін жолға қою маңызды. Бұл үшін қосалқы бөлшектер өндірісінде қолданылатын отандық материалдардың түрін көбейту қажет.
Премьер мысал ретінде Қарағанды облысындағы Qarmet компаниясын атап өтті. Қазіргі таңда кәсіпорын автобустар мен жүк көліктеріне арналған арнайы болат маркаларын шығарып жатыр. Келесі кезеңде жеңіл автомобильдерге арналған болат өндірісін іске қосу жоспарлануда.
Сонымен қатар ол мыс, алюминий, хромды терең өңдеу, резеңке, пластик, кабель және өзге де өндіріс бағыттарын дамытуға мүмкіндік мол екенін айтты.
Осыған байланысты Премьер-министр Өнеркәсіп министрлігіне салалық кәсіпорындармен бірлесіп, бір ай ішінде автобөлшектер өндірісін дамыту жөніндегі іс-қимыл жоспарын әзірлеуді тапсырды.
Айта кетейік, биыл Қазақстанда 190 мың автокөлік шығару жоспарланған. Қазіргі уақытта елдегі 19 жоғары оқу орнында автоөнеркәсіпке қажетті мамандар даярланып жатыр.
