ADYM.KZ / Венгрия астанасы Будапешт қаласында өтіп жатқан УЕФА Чемпиондар лигасының ресми фан-аймағында қазақстандық футболшы Дастан Сәтпаевтың қолтаңбасы қойылған ойын жейдесі (джерси) көрмеге шығарылды.2025 жылдың 8 шілдесінде өткен іріктеу матчында «Олимпия» (Словения) қақпасына гол соғып, таразы басын теңестірді. Әрі командасына маңызды ұпай сыйлады (1:1). Сол сәтте небәрі 16 жаста болған шабуылшы Чемпиондар лигасы тарихында гол соққан ең жас қазақстандық футболшы ретінде рекорд орнатты.
Сондай-ақ, 2025 жылдың 26 қарашасында турнирдің негізгі кезеңіндегі 5-тур аясында «Копенгаген» клубының қақпасына тағы бір тарихи гол соқты. «Копенгагенге» гол соққан сәтте Дастанның жасы 17 жас 110 күн еді. Ол Ансу Фати мен Ламин Ямальдан кейінгі Чемпиондар лигасының негізгі кезеңінде гол соққан әлемдегі ең жас 3-ші футболшы болып тарихқа енді.
Осылайша Сәтпаев УЕФА Чемпиондар лигасының негізгі (топтық/жалпы) кезеңінде гол соққан тұңғыш қазақстандық футболшы атанды.
Дастан Сәтпаев — алматылық «Қайрат» клубының тәрбиеленушісі. Ол 15 жасында негізгі командада дебют жасап, отандық футбол тарихындағы ең дарынды жас ойыншылардың біріне айналды. Сонымен қатар, ол Кюрасао және Бельгия құрамаларына қарсы матчтарда көзге түсіп, Қазақстан ұлттық құрамасы тарихындағы ең жас дебютант әрі ең жас гол авторы (17 жас, 3 ай, 3 күн) рекордын да жаңартқан болатын. Алматылық клуб пен лондондық «Челси» арасындағы келісім бойынша, жас талант кәмелеттік жасқа (18-ге) толғаннан кейін ағылшын грандының сапына ресми түрде қосылады.
