ADYM.KZ / Қазақстанда абоненттер енді банк, мемлекеттік орган және қызмет көрсетуші компаниялардан түсетін ресми қоңырауларды оңай ажырата алады. Жаңа тетікке сәйкес, ұялы телефон экранында қоңырау шалушы ұйымның атауы арнайы белгімен көрсетіледі. Бұл туралы ҚР Жасанды интеллект және цифрлық даму вице-министрі Досжан Мұсалиев Орталық коммуникациялар қызметінде өткен брифингте мәлімдеді.
Оның айтуынша, бұл жаңашылдық телекоммуникация саласына енгізілген заңнамалық өзгерістер аясында жүзеге асырылып отыр. Негізгі мақсат – байланыс желілерінің қауіпсіздігін күшейтіп, телефон алаяқтығымен күрес тиімділігін арттыру.
«Абоненттің ресми және алаяқтық қоңырауды ажырата алуы үшін ұялы байланыс желілерінде қоңырауларды таңбалау тетігі енгізілді. Соның нәтижесінде банк, қызмет көрсетуші компаниялар және басқа да ұйымдардан түсетін ресми қоңыраулар телефон экранында ұйымның атауымен көрсетіледі. Мысалы, «Банк» немесе «Toyota Center» деген белгі шығады», – деді Досжан Мұсалиев.
Вице-министрдің сөзінше, бұл жүйе азаматтарға қоңыраудың қай ұйымнан түскенін бірден анықтауға мүмкіндік береді және алаяқтардың жалған қоңырау шалу қаупін азайтады.
Сонымен қатар заңнамалық өзгерістер аясында интернетке қол жеткізу, IP-телефония және транкингтік байланыс қызметтері лицензияланатын болады. Бұдан бөлек, абоненттер байланыс операторларының жарнамалық және ақпараттық хабарламаларынан, автоматты қоңырауларынан бас тарта алады. Сондай-ақ ақылы байланыс қызметтерін қосу тәртібі де жаңартылды.
Телекоммуникация саласына қатысты заң 2026 жылдың тамыз айының соңында күшіне енеді.
