ADYM.KZ / Қазақстанда балалар мен жасөспірімдерге арналған кітапханалар қоры 7 миллионнан асты. Бұл туралы Мәдениет және ақпарат министрлігі хабарлады.
Министрліктің мәліметінше, балалардың кітап оқуға қызығушылығын арттыру – еліміздің мәдени, білім беру және ақпараттық саясатындағы басым бағыттардың бірі. Осы мақсатта кітапханаларды жаңғырту, кітап қорын толықтыру, баспа ісін дамыту және кітап оқу мәдениетін насихаттау бойынша жүйелі жұмыстар жүргізіліп келеді.
Қазіргі таңда елімізде балалар мен жасөспірімдерге қызмет көрсететін 300-ден астам кітапхана жұмыс істейді. Олардың қорында 7 миллионнан астам кітап сақталған. Ал тұрақты оқырмандар саны 1,7 миллионнан асады.
Министрлік мәліметінше, кітапханалардағы сұраныс балалар әдебиетіне деген қызығушылықтың жыл сайын артып келе жатқанын көрсетеді. Жас оқырмандар арасында Бердібек Соқпақбаевтың «Менің атым Қожа», «Балалық шаққа саяхат», Сайын Мұратбековтің «Жусан иісі», Ыбырай Алтынсариннің «Әке мен бала» және Мұхтар Әуезовтің «Көксерек» шығармалары ерекше сұранысқа ие.
2026 жылы кітапхана қорын балалар мен жасөспірімдерге арналған 42 мың жаңа кітаппен толықтыру жоспарланып отыр. Бұл жас оқырмандардың заманауи және классикалық әдебиетке қолжетімділігін кеңейтуге мүмкіндік береді.
Сонымен қатар балалар әдебиетіне қызығушылық кітапханалармен ғана шектелмейді. Жыл басынан бері еліміздегі кітап дүкендерінде балаларға арналған 200 мыңнан астам кітап сатылған.
Министрліктің атап өтуінше, кітап оқу баланың ой-өрісін кеңейтіп, сыни ойлау қабілетін дамытады, таным көкжиегін байытады және ұлттық әрі әлем әдебиетіне қызығушылығын арттырады. Сондықтан кітапсүйер ұрпақ тәрбиелеу елдің зияткерлік және рухани әлеуетін нығайтудың маңызды бағыттарының бірі саналады.
