ADYM.KZ / Халықаралық Fitch Ratings рейтингтік агенттігі «Бәйтерек» холдингінің еншілес ұйымы – Отбасы банкінің ұлттық валютадағы эмитенттің ұзақ мерзімді дефолт рейтингін «BBB» деңгейінде растады. Рейтинг бойынша болжам «Тұрақты» болып қалды.
Агенттік шешімі банктің қаржылық тұрақтылығын, активтер сапасының жоғары деңгейін, тұрақты қорландыру базасын және Қазақстандағы тұрғын үй қаржыландыру жүйесіндегі маңызды рөлін айқындайды.
Отбасы банкінің басқарма төрайымы Ләззат Ибрагимованың айтуынша, бүгінде банкте 4 миллионнан астам депозит ашылған. Оның сөзінше, халықаралық рейтингтің расталуы қаржы институтының тұрақты жұмысын, тиімді бизнес-моделін және салымшылар сенімін көрсетеді.
– Біз үшін Fitch рейтингі – банктің қаржылық тұрақтылығының, бизнес-моделіміздің тиімділігінің және салымшылар тарапынан көрсетілген жоғары сенімнің тәуелсіз халықаралық растауы. Ұлттық даму институты ретінде тұрғын үйді ашық әрі әділ бөлуді қамтамасыз ету бағытындағы мемлекеттік міндетті орындауды жалғастырып келеміз. Процестерді цифрландыру нәтижесінде соңғы бір жылда тұрғын үйді бөлу көлемі үш есеге артты. Осы уақыт ішінде тұрғын үйге мұқтаж ретінде есепте тұрған 21 906 азамат баспаналы болды, – деді Ләззат Ибрагимова.
2026 жылдың алғашқы алты айында Отбасы банкінде 485 252 жаңа депозит ашылды. Бұл өткен жылдың сәйкес кезеңімен салыстырғанда 21,9 пайызға көп. Банк мұны тұрғын үй жинақтарының тиімді шарттарымен және жылдық 3,5 пайыздан басталатын (ЖТСМ – 3,6–4,4%) қолжетімді ипотекалық заемдармен байланыстырады.
Қазіргі уақытта банктің халықтың ұзақ мерзімді депозиттері нарығындағы үлесі 39 пайызды құрайды. Клиенттердің жинақ шоттарында 3,3 трлн теңге сақтаулы.
Отбасы банкінің мәліметінше, қаржы институтының көмегімен күн сайын шамамен 320 қазақстандық тұрғын үй заемын рәсімдейді. Елдегі ипотекалық портфельдің 55 пайызы осы банкке тиесілі. Жыл басынан бері 43 687 қолжетімді тұрғын үй заемы берілген.
Сонымен қатар банк кредиттік портфель сапасы бойынша да жоғары көрсеткіш көрсетіп отыр. 90 күннен астам мерзімі өткен берешегі бар кредиттердің үлесі (NPL 90+) небәрі 0,14 пайызды құрайды. Бұл банк секторындағы орташа көрсеткіштен (4,19%) едәуір төмен.
Қазіргі таңда Отбасы банк актив көлемі бойынша Қазақстандағы екінші деңгейлі банктер арасында төртінші, ал меншікті капитал көлемі бойынша алтыншы орында тұр.
Бүгінде Отбасы банкінің және тұрғын үй құрылыс жинақтары жүйесінің қолдауымен 679 644 қазақстандық отбасы баспаналы болған.
