ADYM.KZ / Пан Ги Мун Қасым-Жомарт Тоқаевтың БҰҰ-дағы қызметін жоғары бағалады
БҰҰ-ның бұрынғы Бас хатшысы Пан Ги Мун Қазақстан Президенті Қасым-Жомарт Тоқаевтың Біріккен Ұлттар Ұйымы жүйесіндегі қызметіне жоғары баға беріп, Мемлекет басшысының халықаралық су ұйымын құру бастамасын толық қолдайтынын мәлімдеді.
Бұл туралы Пан Ги Мун «24KZ» телеарнасына берген сұхбатында айтты.
Пан Ги Мунның сөзінше, Қасым-Жомарт Тоқаевпен кәсіби байланысы екі саясаткердің де сыртқы істер министрі қызметін атқарған кезінен басталған. Кейін олардың кәсіби жолы БҰҰ аясында қайта тоғысып, бірлескен жұмыс жалғасқан.
«Президент Тоқаев екеуіміз мен – Кореяның, ол – Қазақстанның сыртқы істер министрлері болған кезде тығыз жұмыс істедік. Кейін жолдарымыз БҰҰ-да да түйісті. Мен оны Нью-Йорктегі штаб-пәтерден кейінгі екінші орында тұрған ұйымның Женевадағы бөлімшесінің бас директоры етіп тағайындадым», – деді Пан Ги Мун.
«Ол бұл міндетті тамаша атқарды»
БҰҰ-ның бұрынғы Бас хатшысы Қасым-Жомарт Тоқаевтың ұйымдағы қызметіне ерекше тоқталып, оның кәсіби біліктілігін жоғары бағалады.
Пан Ги Мунның айтуынша, БҰҰ жүйесіндегі тәжірибе Қасым-Жомарт Тоқаевтың халықаралық деңгейдегі саяси тәжірибесін қалыптастыруда маңызды рөл атқарған.
«Ол бұл міндетті тамаша атқарды. Оның БҰҰ-дағы сәтті тәжірибесі Қазақстан Президенті болып сайлануына зор септігін тигізді деп ойлаймын», – деді Пан Ги Мун.
Осылайша, БҰҰ-ның бұрынғы басшысы Мемлекет басшысының дипломатиялық қызметтегі тәжірибесі мен халықаралық ұйымдардағы жұмысы оның кейінгі мемлекеттік қызметіндегі маңызды кәсіби негіздердің бірі болғанын атап өтті.
Пан Ги Мун халықаралық су ұйымын құру бастамасын қолдады
Сұхбат барысында Пан Ги Мун Қазақстан Президентінің халықаралық су ұйымын құру туралы бастамасына да қолдау білдірді.
Ол су мәселесінің адамзат үшін стратегиялық маңызы бар екенін атап өтті. Оның пікірінше, су тапшылығы экологиялық және әлеуметтік мәселелермен қатар, мемлекеттер арасындағы шиеленістердің де себептерінің біріне айналуы мүмкін.
«Су – өмірдің негізі. Сусыз адамдар да, жануарлар да, өсімдіктер де тіршілік ете алмайды. Бір жағынан, судың жетіспеушілігі қақтығыстарға себеп болады. Екінші жағынан – су өмірдің, денсаулық пен өркендеудің көзі», – деді Пан Ги Мун.
БҰҰ-ның бұрынғы Бас хатшысы бұл мәселенің тек жекелеген мемлекеттер үшін емес, бүкіл халықаралық қоғамдастық үшін маңызды екенін атап өтті.
Ол өз сөзінде ежелгі қытай философы Лао-Цзының су туралы ойына да тоқталды. Пан Ги Мунның айтуынша, су адамзат үшін тіршіліктің ғана емес, өзара түсіністік пен ынтымақтастықтың да символы бола алады.
«Ежелгі қытай философы Лао-Цзы адамның ең жоғары ізгілігі суға ұқсас әрекет ететінін айтқан», – деп атап өтті ол.
Пан Ги Мун БҰҰ Бас хатшысы қызметінде болған кезінде осы философиялық ұстанымды көшбасшылық қағидаттарының бірі ретінде қарастырғанын айтты.
«Тоқаевтың идеясы өте маңызды»
Пан Ги Мун Қазақстан Президентінің халықаралық су ұйымын құру бастамасын жаһандық деңгейдегі өзекті мәселелердің бірін шешуге бағытталған маңызды қадам ретінде бағалады.
Оның пікірінше, су ресурстарына қатысты проблемалардың күрделене түсуі халықаралық деңгейде үйлесімді әрі тиімді ынтымақтастық тетіктерін қалыптастыруды қажет етеді.
«Философиялық және практикалық тұрғыдан алғанда, Президент Тоқаевтың идеясы өте маңызды және ол бұл жобаны жүзеге асыра алады деп шын жүректен үміттенемін», – деді БҰҰ-ның бұрынғы Бас хатшысы.
Пан Ги Мун Қазақстан Президентінің бастамасына толық қолдау білдіретінін айтып, өз ұстанымын арнайы жеткізуді сұрады.
«Оған менің толық қолдауымды жеткізіңіздер», – деп түйіндеді сөзін Пан Ги Мун.
БҰҰ-ның бұрынғы Бас хатшысының пікірі Қазақстанның халықаралық су ынтымақтастығын дамытуға бағытталған бастамасының жаһандық маңызын айқындай түседі. Су қауіпсіздігі мәселесінің трансшекаралық сипат алуы жағдайында мұндай бастамалар мемлекеттер арасындағы диалог пен өзара іс-қимылды күшейтуге мүмкіндік бермек.
