ADYM.KZ / Мемлекет басшысы Қасым-Жомарт Тоқаев Испания Королі VI Фелипеге және испан халқына ұлттық құраманың футболдан 2026 жылғы әлем чемпионатындағы жеңісіне байланысты құттықтау жеделхатын жолдады. Бұл туралы Ақорданың баспасөз қызметі хабарлады.
Президент жеделхатында Испания құрамасының жоғары шеберлігі, ұйымшыл командалық ойыны мен жеңіске деген жігері миллиондаған жанкүйердің ықыласына бөленгенін атап өтті.
– Ұлттық құрамаңыздың жоғары шеберлігі, үйлесімді командалық ойыны және жеңіске деген жігері миллиондаған жанкүйерді тәнті етті. Испанияның жаһандық деңгейде мойындалған футболдан озық тәжірибесі баршаға үлгі. Осы ретте биыл Қазақстанда «Атлетико Мадрид» клубы академиясының ашылғанын ерекше қуанышпен атап өтемін. Бұл бастама халықтарымыз арасындағы достық пен сан қырлы ынтымақтастықты нығайтуға, сондай-ақ жастар арасындағы байланыстарды тереңдетуге зор серпін береріне кәміл сенемін, – делінген жеделхатта.
Сондай-ақ Мемлекет басшысы Король VI Фелипенің ел игілігі жолындағы бастамаларына табыс тілеп, Испания халқына амандық, бақ-береке және жаңа жетістіктер тіледі.
Еске салайық, Испания құрамасы 2026 жылғы футболдан әлем чемпионатында жеңіске жетіп, өз тарихында екінші рет әлем чемпионы атанды.
