ADYM.KZ / Таяу Шығыстағы геосаяси ахуалдың күрделенуі әлемдік қаржы нарықтарына қысымды күшейтіп, инвесторлардың жоғары пайыздық мөлшерлемелердің ұзақ сақталуына қатысты күтулерін арттырды. Бұл туралы Қазақстан қаржыгерлері қауымдастығының сарапшылары мәлімдеді.
Теңгеге ішкі факторлар әсер етті
Сарапшылардың мәліметінше, 16 шілдедегі сауда қорытындысы бойынша АҚШ долларының бағамы 472,07 теңгеге жетіп, бір күнде 1,54 теңгеге қымбаттады. Сонымен қатар сауда көлемі 428,8 млн долларды құрап, алдыңғы күнмен салыстырғанда 10,2 млн долларға артқан.
Қауымдастық ұлттық валютаның әлсіреуін негізінен ішкі факторлармен байланыстырады. Олардың қатарында бюджет шығыстарының артуы, импорттық төлемдердің көбеюі, сыртқы борышқа қызмет көрсету, мемлекеттік бағалы қағаздар нарығындағы бейрезиденттердің белсенділігі және Бірыңғай жинақтаушы зейнетақы қорының шетел валютасын сатып алуы аталды.
KASE индексі төмендеді
Бейсенбі күнгі сауда қорытындысында KASE индексі 0,47%-ға төмендеп, 7 663,9 тармақты құрады.
Ең айқын төмендеу «Қазатомөнеркәсіп» акцияларында тіркелді. Сарапшылар мұны инвесторлардың пайдасын тіркеуімен байланыстырады. Алдағы уақытта ішкі қор нарығына компаниялардың бірінші жартыжылдықтағы операциялық және қаржылық есептері ықпал етуі мүмкін.
Мұнай бағасы төмендеді
Апта басынан бері шамамен 11%-ға қымбаттаған мұнай бағасы Таяу Шығысқа қатысты бейресми келіссөздер туралы ақпараттан кейін 0,9%-ға арзандап, Brent маркалы мұнайдың бір баррелі 84,2 доллар болды.
Нарық қатысушылары Қатар, Мысыр және Пәкістанның өңірдегі қақтығысты реттеуге бағытталған дипломатиялық бастамаларын бақылап отыр. Дегенмен теңіздегі жүк тасымалына төнген қауіп сақталып отыр.
Сарапшылардың бағалауынша, геосаяси тәуекелдер толық сейілмегендіктен, мұнай бағасындағы тәуекел үстемесі әлі де жоғары деңгейде қалып отыр.
АҚШ қор нарығы әлсіреді
Геосаяси белгісіздік пен технологиялық сектордағы акциялардың арзандауы аясында АҚШ-тың негізгі қор индекстері 0,2–1,5% аралығында төмендеді.
Соған қарамастан, АҚШ экономикасының бірқатар көрсеткіші оң нәтиже көрсетті. Маусым айында бөлшек сауда көлемі өсіп, жұмыссыздық бойынша алғашқы өтінімдер саны азайды.
Алайда сарапшылардың пікірінше, экономиканың тұрақты көрсеткіштері АҚШ Федералдық резерв жүйесінің базалық мөлшерлемені жақын уақытта төмендету ықтималдығын әлсіретіп отыр.
Алтын да арзандады
Нарықтағы күтулердің өзгеруі қорғаныс активтеріне де әсер етті. Алтынның бір унциясының бағасы 1,5%-ға төмендеп, 3 989 долларды құрады. Сонымен қатар АҚШ-тың 10 жылдық мемлекеттік облигацияларының кірістілігі 4,56%-ға дейін өсіп, доллар индексі 100,8 тармаққа жетті.
Қазақстан қаржыгерлері қауымдастығының сарапшылары қазіргі кезеңде нарыққа геосаяси факторлармен қатар АҚШ-тағы инфляция мен Федералдық резерв жүйесінің ақша-несие саясатына қатысты күтулер де айтарлықтай ықпал етіп отырғанын атап өтті.
