ADYM.KZ / Мемлекет басшысы Қасым-Жомарт Тоқаев China Communications Construction Company (CCCC) компаниясының президенті Чжан Биньнаньді қабылдады. Бұл туралы Ақорданың баспасөз қызметі хабарлады.
Кездесу барысында Қазақстанның көлік-логистикалық және энергетикалық әлеуетін арттыруға бағытталған бірлескен стратегиялық жобалардың жүзеге асырылу барысы талқыланды.
Президент Қасым-Жомарт Тоқаев CCCC компаниясының Қазақстанда көп жылдан бері табысты жұмыс істеп келе жатқанын атап өтіп, оның күрделі инфрақұрылымдық жобаларды іске асырудағы сенімді әрі кәсіби серіктеске айналғанын айтты.
Кездесуде Бақты – Аягөз теміржолының құрылысына ерекше назар аударылды. Мемлекет басшысының айтуынша, бұл жоба Қазақстан мен Қытай арасындағы жүк тасымалы көлемін едәуір арттыруға мүмкіндік береді.
Сонымен қатар тараптар Каспий теңізі табанын тереңдету жұмыстарын жүргізу үшін бірлескен кәсіпорын құру мәселесін қарастырды. Президент мұндай кәсіпорынның Каспий маңы елдері мен өзге өңірлерде қауіпсіз теңіз қатынасын қамтамасыз ететін өңірлік орталықтың қалыптасуына ықпал ететініне сенім білдірді.
Кездесуде энергетика саласындағы перспективалы жобалар да сөз болды. Мемлекет басшысы сапар аясында Қазақстандағы алғашқы гидрожинақтаушы электр станциясының құрылысын бірлесіп әзірлеу туралы келісімге қол қойылғанын құптады.
Президенттің айтуынша, бұл жоба елдің ұлттық энергетикалық жүйесінің тұрақтылығын күшейтуге ықпал етеді. Қуаттылығы 600 МВт болатын гидрожинақтаушы электр станциясын Алматы облысындағы Қарғалы өзенінде CCCC компаниясына қарасты China International Water & Electric Corporation кәсіпорнының қатысуымен салу жоспарланып отыр.
