ADYM.KZ / Ақмола облысындағы Жақсы теміржол вокзалы күрделі жаңғыртудан кейін қайта пайдалануға берілді. Жоба Мемлекет басшысының тапсырмасына сәйкес еліміздегі 124 теміржол вокзалын реконструкциялау және жаңғырту бағдарламасы аясында жүзеге асырылды.
Вокзалдың ашылу рәсіміне Ақмола облысы әкімінің бірінші орынбасары Елдос Рамазанов, «Қазақстан темір жолы» ҰК» АҚ өкілдері, теміржол саласының ардагерлері және аудан тұрғындары қатысты.
Қайта жаңғырту барысында вокзал ғимаратының аумағы 203 шаршы метрден 222 шаршы метрге дейін кеңейтілді. Сондай-ақ жолаушылар перронының ұзындығы 388 метрден 503 метрге дейін ұлғайтылды.
Жөндеу жұмыстары аясында ғимараттың шатыры, қасбеті және ішкі бөлмелері толық жаңартылып, инженерлік желілер, жылыту, сумен жабдықтау және электр жүйелері қайта жаңғыртылды. Вокзал жаңа жиһаздармен және қажетті жабдықтармен қамтамасыз етіліп, іргелес аумақ абаттандырылды.
Көлік министрлігінің мәліметінше, нысанды әрлеу кезінде отандық өндірістің заманауи құрылыс материалдары пайдаланылған. Сонымен қатар мүмкіндігі шектеулі азаматтардың кедергісіз қатынауы үшін арнайы сыртқы көтергіш орнатылды.
1960 жылы салынған Жақсы теміржол вокзалы ондаған жылдан кейін алғаш рет күрделі жөндеуден өтті. Қазіргі таңда станция арқылы сегіз жолаушылар пойызы қатынайды. Олар Астана, Алматы, Қостанай, Арқалық, Семей, Павлодар және Маңғыстау бағыттарында жолаушылар тасымалдайды.
