ADYM.KZ / Премьер-министрдің орынбасары – Ұлттық экономика министрі Серік Жұманғарин Ауғанстандағы Ghazanfar Bank директорлар кеңесінің төрағасы Мұхаммед Исмаил Газанфармен кездесті. Кездесуде екі ел арасындағы қаржылық-банктік ынтымақтастықты дамыту және трансшекаралық есеп айырысу жүйесін жетілдіру мәселелері талқыланды.
Серік Жұманғарин Қазақстанның Ауғанстанмен сауда-экономикалық байланысты нығайтуға ерекше мән беретінін атап өтті. Оның айтуынша, өзара сауданың тұрақты дамуы үшін кәсіпкерлер арасындағы есеп айырысуды қамтамасыз ететін сенімді әрі ашық банк инфрақұрылымын қалыптастыру маңызды.
Министрліктің мәліметінше, қазіргі таңда Қазақстандағы 23 екінші деңгейлі банктің екеуі ауған банктерімен корреспонденттік қатынастар орнатқан. 2025 жылдың қорытындысы бойынша Қазақстан мен Ауғанстан арасындағы трансшекаралық төлемдер мен ақша аударымдарының көлемі 2024 жылмен салыстырғанда 26%-ға өсіп, 140 млрд теңгеге жеткен. Ал тауарлар мен қызметтер үшін жүргізілген төлемдер көлемі бес есеге артқан.
Кездесу барысында тараптар банктер арасындағы корреспонденттік қатынастарды кеңейту, тікелей банк арналарын ашу, трансшекаралық төлемдер тетіктерін жетілдіру және сыртқы сауда операцияларын қаржылық сүйемелдеу мәселелерін талқылады. Сонымен қатар тағы бір қазақстандық банктің Ghazanfar Bank-пен корреспонденттік шот ашу рәсімінен өтіп жатқаны айтылды.
Екі ел арасындағы сауда көрсеткіштері де оң динамика көрсетіп отыр. 2026 жылдың қаңтар–сәуір айларының қорытындысы бойынша Қазақстан мен Ауғанстан арасындағы тауар айналымы 342,4 млн АҚШ долларына жетіп, өткен жылдың сәйкес кезеңімен салыстырғанда 2,3 есеге өсті. Оның ішінде экспорт көлемі 338,5 млн долларды құрап, сондай-ақ 2,3 есеге ұлғайған.
Экспорттың негізгі бөлігін бидай, бидай-қара бидай ұны, күнбағыс майы және басқа да ауыл шаруашылығы өнімдері құрады.
Айта кеткен жөн,Ghazanfar Bank – Ауғанстандағы ең көне коммерциялық банктердің бірі. Қаржы ұйымы корпоративтік және жеке клиенттерге дәстүрлі әрі исламдық банктік қызметтердің толық спектрін ұсынады. Соңғы төрт жылда банк Ауғанстанның қаржы реттеушісі тарапынан қаржылық тұрақтылық, басқару сапасы, өтімділік және сенімділік деңгейін бағалайтын CAMEL жүйесі бойынша 2-рейтингке ие болған. Қазақстанда Ghazanfar Bank Zaman Bank-пен серіктестік орнатқан.
