Шымкент қаласында жастар арасында нашақорлықтың алдын алу, АИТВ/ЖИТС туралы ақпараттандыру және салауатты өмір салтын насихаттау мақсатында кездесу ұйымдастырылды, деп хабарлайды Adym.kz ақпараттық сайты Шымкент қалалық Жастар ресрустық орталығы Баспасөз қызметіне сілтеме жасап.
Жастар ресурстық орталығының бастамасымен өткен іс-шара Орталық Азия Инновациялық университетінің студенттеріне арналды.
Кездесудің негізгі мақсаты – жастардың денсаулығына қауіп төндіретін зиянды әдеттердің салдары туралы түсінігін кеңейту, АИТВ/ЖИТС-тің алдын алу жолдарын түсіндіру және жауапты мінез-құлық мәдениетін қалыптастыру. Сонымен қатар қатысушыларға өз денсаулығына жауапкершілікпен қараудың маңызын жеткізу көзделді.
Іс-шараға Шымкент қаласының денсаулық сақтау басқармасына қарасты ЖИТС-тің алдын алу және оған қарсы күрес жөніндегі орталықтың алдын алу бөлімінің маманы Аяжан Джарасбай, ШЖҚ Психикалық денсаулық сақтау орталығының психологы Нұрлан Арыстанбайұлы Сергазиев, сондай-ақ Жастар ресурстық орталығының Аутрич және NEET жастармен жұмыс бөлімінің маманы Аман Мұқтархан қатысты.
Кездесу барысында сала мамандары нашақорлықтың адам ағзасына, психологиялық жағдайына және әлеуметтік өміріне тигізетін кері әсері туралы баяндады. Есірткі заттарын қолданудың денсаулыққа зияны, тәуелділіктің алдын алу және қиын жағдайларда мамандардан көмек сұраудың маңыздылығы түсіндірілді.
Сондай-ақ АИТВ инфекциясының берілу жолдары, оның алдын алу шаралары және инфекцияға қатысты кең таралған қате түсініктер жөнінде ақпарат берілді. Мамандар АИТВ-ның алдын алу үшін медициналық сауаттылықты арттыру, қауіпсіз мінез-құлық қағидаларын сақтау және қажетті жағдайда медициналық тексеруден өту маңызды екенін атап өтті.
Психолог жастардың эмоционалдық саулығы, күйзеліске қарсы тұру және қоршаған ортаның теріс ықпалына берілмеу мәселелеріне тоқталды. Қатысушыларға зиянды әдеттерден аулақ болып, бос уақытын тиімді ұйымдастырудың, спортпен шұғылданудың және пайдалы орта қалыптастырудың маңызы айтылды.
Мұндай кездесулер жастардың денсаулығын сақтауға қатысты білімін арттырып, олардың саналы таңдау жасауына ықпал етеді. Жастар ресурстық орталығының бұл бағыттағы жұмыстары өскелең ұрпақ арасында салауатты өмір салтын қалыптастыруға және әлеуметтік маңызы бар мәселелер бойынша түсіндіру жұмыстарын жүргізуге бағытталған.
