ADYM.KZ / Қырғызстан 2026 жылы өтетін VI Дүниежүзілік көшпенділер ойындарының ресми промо-ролигін таныстырды. Бейнероликте көшпенділер өркениетінің тарихи мұрасы, ұлттық мәдениеттердің сабақтастығы мен халықтарды біріктіретін ортақ құндылықтар көрініс тапқан. Авторлар әр ұлттың өз тарихы, әр мәдениеттің өз үні бар екенін атап өтіп, дәстүрдің болашақ ұрпаққа жалғасуының маңызын көрсетеді.
«Үн естілетін жер. Ғасырлар мен ұрпақтар арқылы. Таулар, далалар мен жолдар арқылы. Халықтар тарихы мен олардың мұрасы арқылы. Дүниежүзілік көшпенділер ойындары Қырғызстанға оралып жатыр», – делінген бейнероликте.
VI Дүниежүзілік көшпенділер ойындары 2026 жылғы 31 тамыз бен 6 қыркүйек аралығында Қырғызстанда өтеді. Ұйымдастырушылардың мәліметінше, дүбірлі додаға әлемнің 90 елінен спортшылар қатысады. Бұған дейін 60-тан астам мемлекет өз қатысуын ресми түрде растаған болатын.
Сондай-ақ ұйымдастырушылар ойындардың ресми талисманы ретінде қар барысын таныстырған еді. Қырғызстан жарысты өткізуге дайындық жұмыстарын күшейтіп жатыр.
Қырғыз Республикасы Дене шынықтыру және спорт жөніндегі мемлекеттік агенттігінің мәліметіне сәйкес, биылғы ойындарда көкпар жарыстары жеке спорт түрі ретінде ұйымдастырылады.
