ADYM.KZ / Астанада Creative Aimaq республикалық жобасы аясында Түркістан облысының креативті индустрия өкілдерінің жәрмеңкесі өтті. Екі күнге созылған шара барысында өңірден келген 50 креатор өз өнімдері мен шығармашылық жобаларын елорда тұрғындары мен қонақтарына таныстырды.
29-30 тамыз күндері Qazaq Creative Hub алаңында ұйымдастырылған жәрмеңкеге 5 200-ге жуық адам келді. Нәтижесінде түркістандық креаторлар жалпы құны 21 млн теңгені құрайтын өнімдерін сатты.
Келушілерге өңір шеберлері әзірлеген сан алуан өнім ұсынылды. Олардың қатарында ұлттық және заманауи бағыттағы кәдесыйлар, зергерлік бұйымдар, ұлттық кілемдер, дизайнерлік киімдер, ат әбзелдері, домбыралар, сондай-ақ киіз, ағаш және қыштан жасалған бұйымдар бар.
Сонымен қатар жәрмеңкеде сәндік паннолар, жібек орамалдар, тақиялар, көрпешелер мен түрлі дизайндағы сөмкелер қойылып, келушілер назарына ұсынылды. Бұл өнімдер Түркістан өңірінің дәстүрлі қолөнері мен заманауи шығармашылық бағыттарының сабақтастығын көрсетті.
Жәрмеңке аясында тек сауда-саттықпен шектелмей, мазмұнды іскерлік және мәдени бағдарлама ұйымдастырылды. Қатысушылар мен келушілер үшін шеберлік сабақтары өткізіліп, креативті индустриядағы жаңа үрдістер таныстырылды.
Сондай-ақ жасанды интеллект пен цифрлық технологияларды қолдануға негізделген инновациялық жобалар мен стартаптар таныстырылды. Бұдан бөлек, сән көрсетілімі мен концерттік бағдарлама өтіп, шараның мәдени мазмұнын толықтырды.
Creative Aimaq жобасының басты ерекшелігі – өңірлердегі шығармашылық кәсіпкерлерге өз өнімдерін кең аудиторияға таныстырып, жаңа нарықтарға шығуға мүмкіндік беру. Осы тұрғыдан алғанда, Түркістан облысының креаторлары үшін елордадағы жәрмеңке өз брендтерін насихаттап қана қоймай, әлеуетті серіктестермен байланыс орнатуға және жаңа іскерлік мүмкіндіктерге жол ашты.
Креативті индустрия өкілдерінің елордадағы жәрмеңкеге қатысуы өңірлік шығармашылық бизнестің әлеуетін көрсетуге де мүмкіндік берді. Ұлттық мәдени мұраға негізделген өнімдермен қатар, заманауи дизайн мен цифрлық технологияларды ұштастырған жаңа жобалар көпшілік назарына ұсынылды.
Creative Aimaq жобасы өңірлердің шығармашылық әлеуетін ел көлемінде таныту мақсатында жалғасын табады. Келесі кезекте Жамбыл облысының креаторлары Астанада өз өнімдері мен шығармашылық жобаларын таныстырады.
