ADYM.KZ / Астанада Ахмет Байтұрсынұлының 154 жылдығына орай №48 мектеп-лицейінің жас педагогтері ерекше шығармашылық жоба жүзеге асырды.
Ұстаздар ұлт ұстазының портретін String art технологиясымен жасап шықты. Көлемі 3×2 метр болатын туындыға 5 мыңға жуық шеге мен 600 метрге жуық жіп пайдаланылған. Жобаны аяқтауға 14 күн кеткен.
Портретті жасау үшін алдымен Ахмет Байтұрсынұлының бейнесі арнайы тақтайшаға проектор арқылы түсіріліп, негізгі сұлбасы белгіленген. Кейін тақтайшаға мыңдаған шеге қағылып, олардың арасына жіп тарту арқылы портрет қалыптастырылған.
Дайын туынды мектеп музейіне қойылды. Енді ол оқушылар мен мектеп қонақтарына Ахмет Байтұрсынұлының тұлғасы мен мұрасын заманауи өнер арқылы таныстыратын көрнекі нысан ретінде қызмет етеді.
Жас педагогтердің айтуынша, жобаның мақсаты – ұлт ұстазының ағартушылық мұрасын жаңа форматта насихаттау. Шығармашылық жоба тарихи тұлға мұрасын заманауи өнермен ұштастыруға бағытталған.
