Мәнерлеп сырғанаудан ел мақтанышы, Олимпиада чемпионы Михаил Шайдоровтың төңірегіндегі шулы мәселе оңтайлы шешімін тапты. Енді спортшының жалақысы мен дайындық қаржысы уақытылы және толық көлемде төленетін болады. Бұл туралы Adym.kz ақпараттық сайты ҚР Туризм және спорт вице-министрі Серік Жарасбаевтың ресми мәлімдемесіне сілтеме жасап, мәлімдейді.
Соңғы уақытта қоғамда үлкен талқылау тудырған спортшы мен ведомство арасындағы келіспеушілік толықтай ретке келтірілді. Вице-министрдің сөзінше, жаңа келісімшарт Шайдоровтың командасына жолданып, қос тарап ресми түрде қол қойған.
«Михаил Шайдоров-отандық спорттың мақтанышы, өз есімін ел спортының тарихына алтын әріптермен жазған саңлақ. Біз оны әрдайым қолдаймыз және халықаралық аренада биік жетістіктерге жете беруіне тілектеспіз. Құжатқа қол қою рәсімі толығымен заң талаптарына сәйкес өтті. Тараптар ортақ мәмілеге келіп, келісімшарттың барлық тармағын жан-жақты талқылады»,-деп атап өтті Серік Жарасбаев.
Министрлік құжатты жұмыс тәртібімен қабылдап үлгерген. Алдағы уақытта келісімшартта көрсетілген барлық қаржылық міндеттемелер мен төлемдер спортшыға еш кедергісіз, толық көлемде аударылады.
Алда – АҚШ-тағы жиын және Олимпиадаға дайындық. Министрліктің таратқан ресми ақпаратына сүйенсек, Михаил Шайдоров жаңа маусымға қызу дайындықты бастап кетпек. Таяу күндері Михаил Шайдоров өз командасымен бірге Туризм және спорт министрлігіне арнайы барады. Кездесуде алдағы жоспарлар, келесі Олимпиадаға дайындық барысы және елімізде мәнерлеп сырғанауды дамытудың жаңа тетіктері талқыланады. 5 маусымда отандық мәнерлеп сырғанау шебері жаңа маусымға дайындық жиындарын өткізу үшін АҚШ-қа аттанады. Осылайша, спортшының алаңсыз жаттығуына мүмкіндік туды.
Ендігі кезек мұздағы жаңа жеңістерде.
