ADYM.KZ / Қазақстан Кітапханалар Одағы кітапхана ісі мамандарына арналған жаңа ақпараттық портал – kitaphanalarodagy.kz ресурсын іске қосты.
Жаңа платформада кітапхана саласына қатысты заңнамалық және нормативтік құжаттар, әдістемелік әрі білім беру материалдары, салалық басылымдар және отандық баспалар туралы ақпарат жинақталған.
Порталдың негізгі мақсаты – кітапхана мамандары арасында тәжірибе алмасуға және кәсіби коммуникацияны дамытуға мүмкіндік жасау. Ресурста сала жаңалықтары мен алдағы іс-шаралар туралы ақпарат жарияланып, оқыту материалдары ұсынылады. Сондай-ақ мамандардың пікір алмасуына арналған форум жұмыс істейді.
Порталда «Зерделі ұлт» бағытына да ерекше мән берілген. Оның аясында кітап оқу мәдениетін дәріптеу, кітапханалардың қоғамдағы рөлін арттыру және ұлттық зияткерлік құндылықтарды насихаттау көзделген.
Жаңа ресурс кітапхана ісінде маңызды өзгерістер қолға алынып жатқан кезеңде іске қосылды. Қазіргі таңда «Кітапхана және баспа ісі туралы» заң жобасы талқыланып, библиографиялық сипаттаудың халықаралық стандарттарын енгізу жұмыстары жүргізілуде. Сонымен қатар электрондық құжаттарды есепке алу тетіктері әзірленіп, кітапхана жұмысында цифрлық технологиялар мен жасанды интеллект құралдарын қолдануға басымдық беріліп отыр.
Қазақстан Кітапханалар Одағының ресми порталы қазақ, орыс және ағылшын тілдерінде жұмыс істейді. Пайдаланушылар қажетті ақпаратты іздеу жүйесі мен тақырыптық сүзгілер арқылы оңай таба алады.
Порталға тіркелген қолданушылар жеке кабинеті арқылы қосымша қызметтерді пайдалану мүмкіндігіне ие.
