ADYM.KZ / Қазақ қайта өңдеу және тағам өнеркәсіптері ғылыми-зерттеу институтының ғалымдары сауын түйелерге арналған жусан негізіндегі биологиялық белсенді қоспасы бар алғашқы отандық экструзияланған құрама жемді әзірледі. Бұл туралы Ауыл шаруашылығы министрлігі хабарлады.
Министрліктің мәліметінше, елімізде баламасы жоқ бұл әзірлеменің тиімділігі ғылыми зерттеулер барысында дәлелденген.
Ғалымдар төрт апта бойы жаңа жемнің түйелердің сүт өнімділігіне әсерін зерттеген. Нәтижесінде тәжірибелік топтағы әр түйенің орташа тәуліктік сүт сауымы 100 миллилитрге артқаны анықталды. Сонымен қатар сүттің сапалық көрсеткіштері де жақсарған: майлылығы 1,92 пайызға, ақуыз мөлшері 1,52 пайызға, ал майсыз құрғақ сүт қалдығының үлесі 0,91 пайызға өскен.
Жаңа өнімнің басты ерекшелігі – Қазақстанда кең таралған жусан өсімдігі негізінде дайындалған биологиялық белсенді қоспаның қолданылуы. Заманауи өңдеу технологияларының арқасында ғалымдар қоректік заттардың жақсы сіңуіне ықпал ететін әрі жануарлардың өнімділігін арттыратын функционалды жем әзірлеген.
Мамандардың айтуынша, бұл жаңалық әсіресе құрғақ климатты өңірлер үшін маңызды. Себебі түйе шаруашылығы мұндай аймақтарда мал шаруашылығының ең төзімді әрі болашағы зор бағыттарының бірі саналады. Жаңа құрама жемді өндіріске енгізу түйе сүтін өндіру тиімділігін арттырып қана қоймай, жем өндірісінде отандық өсімдік шикізатын кеңінен пайдалануға мүмкіндік береді.
Жоба авторлары зерттеу нәтижелері түйе шаруашылығын дамытуға және түйе сүті негізінде жоғары қосылған құны бар өнімдер шығаруға жаңа мүмкіндіктер ашатынын атап өтті.
