ADYM.KZ / Әлемге әйгілі испаниялық әнші Энрике Иглесиас Польшадағы концертінен кейін қазақстандық жанкүйерлеріне қазақ тілінде үн қатып, көпшіліктің ықыласына бөленді.
Гданьск қаласында өткен концерттен кейін сахна сыртында әншімен кездескен қазақстандық жанкүйерлер оған Қазақстанда кеңінен танымал шоколадты сыйға тартқан. Сыйлыққа риза болған Энрике Иглесиас камера алдында қазақ тілінде: «Алға, Қазақстан!» деп айтып, жанкүйерлеріне жылы лебізін жеткізді.
Айта кетейік, әнші биыл Қазақстанда екі концерт өткізуді жоспарлап отыр. Энрике Иглесиас 3 қыркүйекте Астанада, ал 5 қыркүйекте Алматыда өнер көрсетеді. Концерт бағдарламасына орындаушының әлемге әйгілі Bailando, Hero, Escape және Súbeme la Radio секілді хит әндері енеді деп күтілуде.
Ұйымдастырушылардың мәліметінше, концерт бағдарламасы көрермендердің ықыласына қарай өзгеруі мүмкін. Сондай-ақ әнші дәстүрлі түрде жанкүйерлерімен еркін қарым-қатынас жасап, олардың сыйлықтары мен тілектеріне ерекше назар аударады.
Еске салайық, бұған дейін бірқатар бұқаралық ақпарат құралдарында Энрике Иглесиастың Қазақстандағы концерттері кезінде сахнадағы этикалық нормаларға қатысты белгілі бір талаптар қойылуы мүмкін екені туралы ақпарат тараған болатын.
