ADYM.KZ / Үндістанның Дели қаласында өтіп жатқан семсерлесуден Азия чемпионатында Қазақстан құрамасы кезекті алтын медальға қол жеткізді.
Ерлер арасындағы командалық шпага сайысында Ерлік Сертай, Вадим Шарлаимов, Никита Жулинский және Кирилл Проходовтан құралған Қазақстан құрамасы құрлық чемпионы атанды.
Қазақстандық спортшылар финалда соңғы екі Олимпиада ойындарының жүлдегері саналатын Жапония құрамасымен кездесті. Тартысты өткен шешуші бәсекеде отандастарымыз 45:40 есебімен жеңіске жетіп, Азия чемпионатының алтын медалін иеленді.
Осылайша, Қазақстан құрамасының қоржынындағы жүлделер саны төртеуге жетті. Бұған дейін әйелдер арасындағы жекелей шпага жарысында Ирина Бакалдина чемпион атанса, Руслан Курбанов қола медаль жеңіп алған болатын.
Сондай-ақ ерлер арасындағы командалық қылыш сайысында Қазақстан құрамасы қола жүлдеге қол жеткізді.
Делиде өтіп жатқан құрлық біріншілігінде қазақстандық семсерлесушілер жоғары нәтиже көрсетіп, командалық және жекелей сында жүлделі орындардан көрінуде.
